इंडिया दर्पण ऑनलाईन डेस्क – पैशाचे झाड नसते पण बनावट नोटा तयार करून त्या चलनात किंवा बाजारात आणण्याचे प्रकार गेल्या काही वर्षांपासून सर्रासपणे सुरू आहे. सर्व समाजासाठी अत्यंत धोकादायक आणि देशाच्या विकासाला घातक ठरणार हा गैरप्रकार बंद व्हावा म्हणून अनेक उपाययोजना करण्यात येतात. तरीही गेल्या दहा-पंधरा वर्षांपासून बनावट नोटा छापण्याचे प्रकार दिवसेंदिवस वाढतच आहेत. त्यामुळेच सुमारे पाच वर्षांपूर्वी मोदी सरकारने याला पायबंद बसावा म्हणून नोटाबंदी जाहीर केली होती. परंतु त्यानंतर ही बनावट नोटाचे प्रकार काही कमी झालेले दिसून येत नाही. विशेषतः पैसे 100, 200 आणि 500 रुपयांच्या बनावट नोटा आपल्याला बाजारात मोठ्या प्रमाणावर दिसून येतात. साहिबााबाद पोलिसांनी आठवी पास मजूर खुशी मोहम्मद याला अर्थला येथील पेट्रोल पंपावरून बनावट नोटा छापण्याच्या गुन्ह्यात अटक केली.
विशेष म्हणजे रातोरात श्रीमंत होण्याच्या इच्छेने तो यूट्यूबवरून शिकून गिरधरपूर बदलपूर येथील भाड्याच्या घरात या नोटा छापत होता. खुशी मोहम्मद हा दिवसा मजूर म्हणून काम करायचा आणि रात्री नोटा छापायचा. त्याने 500, 200 आणि 100 रुपयांच्या 94 हजार मूल्यांच्या नोटा छापल्या होत्या. पोलीस ठाण्यात चौकशी केली असता त्याने बनावट नोटा छापून पोलिसांना दाखविले. नोटा चालवण्यासाठी ज्याला आपला एजंट बनवायचा होता, त्याने पोलिसांना माहिती दिली.
यानंतर पोलिसांनी सापळा रचला आणि नोटा बदलून घेण्यासाठी तो पेट्रोल पंपावर पोहोचताच त्याला पकडण्यात आले. त्याच्याकडून 9400 रुपयांच्या बनावट नोटा सापडल्या. त्याच्या घरातून प्रिंटर, कटर, टेप आदी साहित्य जप्त करण्यात आले आहे. एसपी ज्ञानेंद्र कुमार सिंह यांनी सांगितले की, खुशी मोहम्मद हा मूळचा बदाऊन जवळील उनाखचा रहिवासी आहे. तो काही काळ गिरधरपूरमध्येही राहत होता.
Eighth Pass Laborer Duplicate Notes Printing Crime Police Delhi Ghaziabad