नाशिक : शहरातील वेगवेगळया भागात राहणा-या दोघांनी शुक्रवारी (दि.३) गळफास लावून घेत आत्महत्या केली. त्यात ३४ वर्षीय महिलेसह ४८ वर्षीय पुरूषाचा समावेश आहे. दोघांच्याही आत्महत्येचे कारण समजू शकले नाही. याप्रकरणी इंदिरानगर आणि नाशिकरोड पोलीस ठाण्यात मृत्युची नोंद करण्यात आली आहे. पाथर्डी रोडवरील दाढेगाव येथील सुनिता बाळासाहेब उबाळे (३४ रा.प्रभुचंद्रनगर) या महिलेने शुक्रवारी दुपारच्या सुमारास अज्ञात कारणातून आपल्या राहत्या घरातील छतास ओढणी बांधून गळफास लावून घेतला होता. ही बाब निदर्शनास येताच कुटुंबियांनी त्यांना तात्काळ जिल्हारूग्णालयात दाखल केले असता वैद्यकीय सुत्रांनी मृत घोषीत केले. याप्रकरणी इंदिरानगर पोलीस ठाण्यात मृत्युची नोंद करण्यात आली असून अधिक तपास हवालदार पथवे करीत आहेत. दुसरी घटना देवळाली गावात घडली. रामनाथ रानू गायकवाड (४८ रा.म.ज्योतीबा फुले नगर,मालधक्का रोड) यांनी शुक्रवारी सायंकाळच्या सुमारास अज्ञात कारणातून आपल्या राहत्या घरात पंख्याला दोरी बांधून गळफास लावून घेतला होता. ही घटना लक्षात येताच कुटुंबियांनी त्यांना तात्काळ बिटको रूग्णालयात दाखल केले असता वैद्यकीय सुत्रांनी मृत घोषीत केले. याप्रकरणी नाशिकरोड पोलीस ठाण्यात मृत्युची नोंद करण्यात आली असून अधिक तपास पोलीस नाईक चव्हाण करीत आहेत.
