इंडिया दर्पण ऑनलाईन डेस्क – बॉलीवूडचा किंग खान अर्थात शाहरुख खान चार वर्षांनी मोठ्या पडद्यावर परतला. या पदार्पणातच त्याचा ‘पठाण’ चित्रपट बॉक्स ऑफिसवर तुफान हिट झाला. प्रदर्शनापूर्वीच वादात सापडलेला हा चित्रपट चालेल की नाही अशी परिस्थिती असताना, या चित्रपटाने बॉक्स ऑफिसवर अक्षरशः धुमाकूळ घातला. बाकी काहीही असले तरी ‘पठाण’ने सिनेसृष्टीला संजीवनी दिली आहे. कोरोनानंतर मरगळलेल्या चित्रपटसृष्टीतला तरतरी आली आहे. आता ‘पठाण’ प्रमाणेच आणखी एका चित्रपटाने प्रदर्शनाच्या पहिल्याच दिवशी चांगला गल्ला जमवला आहे.
होळीच्या मुहूर्तावर प्रदर्शित झालेल्या ‘तू झूठी मैं मक्कार’ या चित्रपटाला प्रेक्षकांकडून दमदार प्रतिसाद मिळतोय. लव रंजन दिग्दर्शित या रोमँटिक कॉमेडी चित्रपटातून प्रेक्षकांच्या भेटीला रणबीर आणि श्रद्धा कपूर ही नवीन जोडी आली आहे. प्रदर्शनाच्या पहिल्याच दिवशी रणबीर-श्रद्धाच्या या चित्रपटाने दमदार कामगिरी केली आहे. चित्रपट व्यापार विश्लेषक तरण आदर्शने दिलेल्या माहितीनुसार, बुधवारी या चित्रपटाने १५.७३ कोटी रुपयांचा गल्ला जमवला आहे.
https://twitter.com/NEWSINSIDEMEDIA/status/1634063040168755200?s=20
या चित्रपटानं पहिल्याच दिवशी इतकी कमाई केल्याने सगळ्यांनाच आश्चर्य वाटते आहे. ‘पठाण’नंतर बॉक्स ऑफिसवर पहिल्याच दिवशी इतकी कमाई करणारा हा पहिला चित्रपट ठरला आहे. विशेष म्हणजे या चित्रपटाच्या ट्रेलरनंच प्रेक्षकांना वेड लावलं होतं. ‘तू झूठी मैं मक्कार’ चित्रपटात रणबीर आणि श्रद्धासोबतच डिंपल कपाडिया, अनुभव सिंह बस्सी यांच्याही महत्त्वपूर्ण भूमिका आहेत. बऱ्याच काळानंतर बॉलिवूडमध्ये असा रोमँटिक कॉमेडी चित्रपट प्रेक्षकांच्या भेटीला आला आहे. या चित्रपटातून निर्माते, दिग्दर्शक बोनी कपूर यांनी अभिनयक्षेत्रात पदार्पण केलं आहे.
रणबीर – श्रद्धा ही प्रेक्षकांसाठी फ्रेश जोडी आहे. आतापर्यंत हे दोघे कोणत्याच चित्रपटात एकत्र झळकलेले नाहीत. त्यामुळे प्रेक्षकांमध्ये देखील या जोडीबाबत उत्सुकता होती. प्रेक्षकांची ही उत्सुकता आणखी ताणून धरत या दोघांनी चित्रपटाचे प्रमोशनही वेगवेगळे केले.
८ मार्च रोजी हा चित्रपट देशभरातील थिएटर्समध्ये प्रदर्शित झाला. दिल्ली आणि गुजरातमध्ये या चित्रपटाची चांगली कमाई झाली. मात्र महाराष्ट्रात अपेक्षित प्रतिसाद मिळाला नाही. मुंबई आणि पुण्यासारख्या शहरांमध्ये या चित्रपटाला आणखी चांगला प्रतिसाद मिळू शकतो. तसेच धुळवडीमुळे उत्तर प्रदेशातही कमी कमाई झाली. कमाईचा हा आकडा दुसऱ्या दिवशी आणखी वाढू शकतो, असा अंदाज आहे. लव रंजनचे चित्रपट एकाच पठडीतील असले तरी प्रेक्षकांकडून त्यांना दमदार प्रतिसाद मिळतो.
Ranbir Shraddha Kapoor Movie Tu Jhooti Mai Makkar Collection
