पुणे (इंडिया दर्पण वृत्तसेवा) – उन्हाळा आला की आंब्याचं मार्केट बहरून जातं. वेगवेगळ्या प्रकारचे आंबे खाण्यासाठी लोकांची धडपड असते. पण या साऱ्यात हापूस आंबा मात्र प्रत्येकाच्या नशिबी नसतो. कारण त्याचे दर परवडणारे नसतात. दोन आंबे घ्यायचे म्हटल्यावर घाम फुटतो. पण पुण्यातील एका व्यापाऱ्याने चक्क ईएमआयवर हापूस आंबा उपलब्ध करून देत साऱ्यांचं लक्ष वेधलं आहे.
गौरव सणस असे त्यांचे नाव असून त्यांनी हापूस आंब्याची पेटी ईएमआयवर विकायला सुरुवात केली आहे. ते बारा वर्षांपासून आंबा विक्रीचा व्यवसाय करीत आहेत. पुण्यातील सनसिटी रोडवर आनंद नगर परिसरात त्यांचे चॉकलेट आणि फटाक्यांचे दुकान आहे. या वर्षापासून त्यांनी आपल्या दुकानात ईएमआयवर आंबे विकण्यास सुरुवात केली आहे. काही ग्राहकांनी त्याच्याकडून प्रत्येकी ३० हजार रुपयांचे आंबे खरेदी केले आहेत. त्यांना एका वर्षासाठी प्रत्येकी अडिच हजार रुपये ईएमआय म्हणून भरावे लागतील.
नैसर्गिकरित्या पिकवलेला देवगड हापूस आंबा ईएमआयवर दिला जात असल्याने केवळ पुण्यातील नाही तर बाहेरच्या लोकांमध्येही कमालीची उत्सुकता निर्माण झाली आहे. त्यांनी पेटीएमशीही करार केला आहे. सामान्य माणूस महागडे आंबे खरेदी करु शकत नाही, त्यामुळे ही कल्पना गौरव यांनी पुढे आणली आहे. तुम्ही आंबे खरेदी केल्यानंतर तुमच्या पूर्ण रकमेचे हप्ते पाडून तुम्ही तुमच्या आंब्याचे पेमेंट पूर्ण करू शकता. विशेष म्हणजे अगदी छोट्या रकमेचे देखील ईएमआय तुम्ही घेऊ शकता. तुम्ही जसे फ्लॅटचे, गाडीचे आणि मोबाईलचे ईएमआय पाडून घेता अगदी तसेच आता तुम्हाला आंबा देखील ईएमआयवर मिळणार आहे
मग आंबा का नाही?
लोक ईएमआयवर मोबाईल खरेदी करतात. कारण त्यांच्याकडे पैसे नसतात. मग आंबा ईएमआयवर खरेदी करायला काय हरकत आहे? ईएमआयमुळे गोष्टी सोप्या होतात. म्हणून माझ्या मनात कल्पना आली की ईएमआयवरही आंबा विकता येईल. जर एखाद्या व्यक्तीने पाच हजार रुपयांचा आंबा खरेदी केला तर त्याला आठ महिने किंवा बारा महिन्यांच्या ईएमआयवर पैसे भरण्याची सुविधा मिळेल, असे गौरव सणस म्हणतात.
Pune Fruit Alphonso Mango Sale on EMI
