नाशिक बस आग अपघात- डीएनए टेस्टमुळे पटली तीन मृतांची ओळख; मृतदेह नातेवाईकांकडे सुपूर्द

नाशिक (इंडिया दर्पण वृत्तसेवा) – लक्झरी बस अग्नितांडव दुर्घटनेतील तिघा अनोळखी मृतदेहांची ओळख पटविण्यात यश आले आहे. डीएनए चाचणीचा अहवाल प्राप्त झाल्याने वैद्यकिय प्रक्रिया पूर्ण करून संबधीतांचे मृतदेह मध्यरात्री नातेवाईकाच्या स्वाधिन करण्यात आले आहेत. गजानन शालीकराम लोणकर (२३, रा. आसेगाव, जि. वाशिम), हरिभाऊ तुकाराम भिसनकर (२८, रा. वाटखेड, जि. यवतमाळ), मीनेश यादव इंगळे (३७) अशी मृतांची नावे आहेत.

औरंगाबाद महामार्गावर कैलासनगर तपोवनाजवळ शनिवारी (दि. ८) पहाटे पाच वाजेच्या सुमारास खासगी लक्झरी बस व आयशर ट्रकमध्ये झालेल्या भीषण अपघातात १२ प्रवासी होरपळून ठार झाले होते. नातेवाइकांच्या मदतीने पोलीस व जिल्हा रुग्णालय प्रशासनाने रविवारपर्यंत नऊ मृतदेहांची ओळख पटविली होती. तिघा मृतदेहांच्या नातेवाइकांचे डीएनए नमुने घेऊन ते तपासणीसाठी पाठविण्यात आले होते. सोमवारी (दि. १०) रात्री उशिरा डीएनए अहवाल यंत्रणेला प्राप्त झाला. रात्री साडेअकरा वाजेच्या सुमारास वैद्यकीय प्रक्रिया पूर्ण करून मृतदेह नातेवाइकांना सोपविण्यात आल्याचे आडगाव पोलिसांनी सांगितले.

दरम्यान या भीषण दुर्घटनेतील ४३ जखमींपैकी जिल्हा रुग्णालयात पाच तर आडगाव वैद्यकीय महाविद्यालयात एक व खासगी रुग्णालयात एक असे सात जखमींवर उपचार सुरू आहेत. उर्वरित सर्व जखमींना डिस्चार्ज देण्यात आला. बसमध्ये पाठीमागे झोपलेला बदली चालक आणि वाहक सुदैवाने बचावले असून त्यांच्यासह ट्रॅव्हल्सच्या संचालकांकडे चौकशी सुरू आहे. या तपासाबाबत आडगाव पोलिसांची वेगवेगळी पथके कार्यरत असल्याचे वरिष्ठ पोलीस निरीक्षक इरफान शेख यांनी सांगितले

Nashik Fire Travel Bus Accident Death DNA Test Report