नाशिक (इंडिया दर्पण वृत्तसेवा)- कामगार नगर येथील खूनाच्या घटनेत सहभागी अल्पवयीन मुलाच्या हत्येचा उलगडा करण्यात पोलीसांना यश आले आहे. या घटनेतील पाच जणांच्या शहर गुन्हे शाखेच्या युनिट १ पथकाने मुसक्या आवळल्या असून त्यात दोन अल्पवयीन मुलांचा समावेश आहे. ही हत्या सराईत गुन्हेगार हर्षद पाटणकर याने सुपारी देवून घडवून आणल्याचे तपासात पुढे आले असून संशयित टोळक्यास अंबड पोलीसांच्या स्वाधिन करण्यात आले आहे.
मोहन ज्ञानेश्वर वायचळे (१८ रा. तिरंगाचौक,कामगारनगर), राहूल राजू गडदे (२० मुळ रा.नांदूर कोंडार ता. नांदगाव हल्ली रिक्षा स्टॅण्ड जवळ आनंदवली) व साहिल पिंटू जाधव (२१ रा.माळीवाडा आनंदवली) अशी अटक करण्यात आलेल्या संशयितांची नावे असून त्यांचे दोन अल्पवयीन साथीदार पोलीसांच्या ताब्यात आहेत. सिडकोतील कामटवाडा येथील स्मशानभूमी भागात सोमवारी (दि.२८) करण उमेश चौरे (वय १७, रा. संत कबीरनगर) या अल्पवयीन मुलाची दगडाने ठेचून हत्या करण्यात आली. चौरे याचा कामगार नगर भागात ८ मार्च रोजी झालेल्या अरूण बंडी या युवकाच्या खून प्रकरणात समावेश असल्याने त्याची रवानगी बालगृहात करण्यात आली होती.
१९ एप्रिल रोजी तो बालगृहातून जामिनावर बाहेर येताच जीवाला धोका असल्याने तो कामटवाडा भागात राहणा-या आपल्या मित्राच्या घरी वास्तव्यास होता. याची कुणकुण प्रतिस्पर्धी टोळक्यास लागल्याने खून का बदला खून या भावनेतून ही हत्या झाली होती. हल्लेखोर टोळक्यानेही चौरे या निर्घृण खून करीत बदला घेतला रे असे म्हणत धुम ठोकली होती. या घटनेची दखल घेत पोलीस हल्लेखोरांच्या मागावर असतांना युनिट १ चे हवालदार विशाल काठे व प्रशांत मरकड यांना मिळालेल्या माहितीच्या आधारे ही कारवाई करण्यात आली. संशयित टोळके गंगापूररोडवरील आसाराम बापू पुल परिसरात थांबले असून ते भुमिगत होण्याच्या मार्गावर असल्याची माहिती पोलीसांना मिळाली होती. पथकाने घटनास्थळ गाठून घटनेनंतर अवघ्या चार तासाच्या आत तीघा संशयितांना बेड्या ठोकत त्यांच्या अल्पवयीन दोन साथीदारांनाही ताब्यात घेतले आहे.
सराईत गुन्हेगार हर्षद पाटणकर याच्या सांगण्यावरून हा गुन्हा केल्याची संशयितानी कबुली दिली असून त्यांना अंबड पोलीसांच्या स्वाधिन करण्यात आले आहे. ही कारवाई आयुक्त संदिप कर्णीक,उपायुक्त प्रशांत बच्छाव,सहाय्यक आयुक्त संदिप मिटके व युनिट १ चे वरिष्ठ निरीक्षक मधुकर कड यांच्या मार्गदर्शनाखाली सहाय्यक निरीक्षक हिरामण भोये,उपनिरीक्षक चेतन श्रीवत,सुदाम सांगळे हवालदार प्रविण वाघमारे,प्रदिप म्हसदे,संदिप भांड,प्रशांत मरकड,विशाल काठे,नाझीमखान पठाण,योगीराज गायकवाड,रोहिदास लिलके पोलीस नाईक विशाल देवरे,मलींदसिंग परदेशी अंमलदार मुक्तार शेख,अमोल कोष्टी,राम बर्डे अनुजा येलवे,सुक्राम पवार व समाधान जाधव आदींच्या पथकाने केली.
