नाशिक (इंडिया दर्पण वृत्तसेवा) – वास्को चौकात त्रिकुटाने दोघा भावांसह एकास बेदम मारहाण केल्याप्रकरणी नाशिकरोड पोलिस ठाण्यात गुन्हा दाखल करण्यात आला आहे. या घटनेत लोखंडी रॉड आणि तलवारीचा वापर करण्यात आला. या मारहाणीत दोन जण जखमी झाले आहे. शंकर चावरीया, गोरख चावरीया व शुभम चावरीया (रा.सर्व फर्नांडीसवाडी,उपनगर) अशी गुन्हा दाखल करण्यात आलेल्या संशयितांची नावे आहेत.
याप्रकरणी सोनसिंग बच्चनसिंग शिकलकर (१८ रा.शिकलकर वस्ती,सिन्नरफाटा) या युवकाने तक्रार दाखल केली आहे. सोनसिंग शिकलकर व अनमोलसिंग चरणसिंग शिकलकर हे दोघे मावस भाऊ गुरूवारी (दि.१९) रात्री रिपेअरींगला टाकलेला मोबाईल घेण्यासाठी वास्को चौकात गेले असता ही घटना घडली. वास्को चौकात उभ्या असलेल्या तिघा संशयितांनी दोघा भावांना गाठून मागील भांडणाची कुरापत काढून जीवे मारण्याची धमकी देत शिवीगाळ केली. यावेळी दोघा भावांनी समजून सांगण्याचा प्रयत्न केला असता त्रिकुटापैकी एकाने अनमोलसिंग यांच्या डोक्यात लाकडी दांडका व लोखंडी रॉड मारून जखमी केले. यावेळी त्रिकुटाने वाद बघणा-या भगवान देवीदास सुर्यवंशी यास तू काय बघतो तुला पण जीवंत सोडणार नाही असे म्हणत संशयित टोळक्याने त्याच्यावरही लोखंडी रॉड व तलवारीने हल्ला केला. या घटनेत अनमोलसिंग आणि भगवान जखमी झाला असून अधिक तपास सहाय्यक निरीक्षक जगताप करीत आहेत.
