नाशिक (इंडिया दर्पण वृत्तसेवा) – एमएचबी कॉलनीत सातहून अधिक पार्क केलेल्या चारचाकी वाहनांच्या काचा फोडणा-याला पोलिसांनी गजाआड केले. पोलिसांनी सीसीटिव्ही फुटेजच्या आधारे संशयितास अटक केली. आकाश निवृत्ती जगताप (२१ रा.एमएचबी कॉलनी, सातपूर) असे अटक केलेल्या संशयिताचे नाव आहे. ही कारवाई शहर गुन्हे शाखेच्या युनिट २ च्या पथकाने केली.
सोमवारी मध्यरात्री नंतर एमएचबी कॉलनीत घरासमोर पार्क केलेल्या चारचाकी वाहनांना लक्ष करीत अज्ञातांनी काचा फोडल्या होत्या. या घटनेत सातहून अधिक कारच्या काचा फोडून नुकसान करण्यात आले होते. त्यात रविंद्र सगरे यांच्या एमएच १५ ईबी ३७३० आणि रूबी आलमशहा (रा.सातपूर कॉलनी) यांच्या एमएच १५ डीएम १४६५ या कारचाही समावेश होता. सकाळच्या सुमारास ही बाब निदर्शनास आल्याने वाहनधारकांमध्ये खळबळ उडाली होती. याप्रकरणी सातपूर पोलिस ठाण्यात गुन्हा दाखल करण्यात आला होता. या घटनेची पोलिस आयुक्तांनी गंभीर दखल घेत माथेफिरूस हुडकून काढण्याचे आदेश दिल्याने पोलिस यंत्रणा कामाला लागली होती.
सातपूर पोलिसांसह युनिट २ चे पथक परिसरातील सीसीटिव्हीच्या आधारे भामट्यांचा शोध घेत असतांना हवालदार राजेंद्र घुमरे आणि संजय सानप यांनी केलेल्या निरीक्षणाच्या माध्यमातून संशयितास ताब्यात घेतले असता त्याने गुह्याची कबुली दिली. संशयितास सातपूर पोलिसांच्या स्वाधिन करण्यात आले असून ही कारवाई निरीक्षक आनंदा वाघ यांच्या मार्गदर्शनाखाली उपनिरीक्षक पोपट कारवाळ, जमादार यशवंत बेंडकोळी, राजेंद्र घुमरे, सुनिल आहेर, प्रशांत वालझाडे, संतोष ठाकूर आदींच्या पथकाने केली.