नाशिक (इंडिया दर्पण वृत्तसेवा) – महिला व्यावसायीकाच्या नावाने फायनान्स कंपनीकडून परस्पर कर्ज काढणा-या विरुध्द आडगाव पोलिस ठाण्यात गुन्हा दाखल करण्यात आला आहे. तारीख उलटूनही हप्ता न मिळाल्याने वसूली अधिका-यांनी व्यावसायीकाचे घर गाठल्याने हा प्रकार समोर आला आहे. पेटीएम आणि गुगल पे मिनीस्पिकर देण्याच्या बहाण्याने कागदपत्र घेवून ही फसवणूक करण्यात आली आहे. पोलिसांनी दिलेल्या माहितीनुसार मलिक नामक भामट्यांनी महिला व्यावसायीकांना गंडविले आहे. याप्रकरणी कल्याणी संदिप गोडसे (रा.माळवाडी,माडसांगवी ता.जि.नाशिक) यांनी तक्रार दाखल केली आहे. गोडसे यांचे माडसांगवी गावात अंतरा कलेक्शन तर नेहा पेखळे यांचे हिंदवी स्वराज नावाचे किराणा दुकान आहे. गेल्या १ नोव्हेंबर रोजी दोन्ही महिला आपआपला व्यवसाय सांभाळत असतांना संशयिताने त्यांना गाठले. यावेळी पेटीएम, गुगल व फोन पे सुविधेसाठी मिनी स्पिकर पुरविण्याचे काम बघत असल्याचे सांगून त्याने दोन्ही महिला व्यावसायीकांच्या कागदपत्राचे मोबाईल मध्ये फोटो काढले. या कागदपत्राच्या आधारे संशयिताने गोडसे यांच्या नावे दहा हजार तर पेखळे यांच्या नावे १२ हजार असे होम क्रेडिट फायनान्स या कंपनीतून परस्पर २२ हजार रूपयांचे कर्ज काढून ही रक्कम त्रयस्त नावाच्या बँक खात्यात वर्ग करून सदरची रोकड लांबविली. महिना उलटूनही गोडसे व पेखळे यांच्याकडून फायनान्स कंपनीला हप्त्याची रक्कम न मिळाल्याने वसूली प्रतिनिधींनी त्यांची भेट घेतली असता फसवणुकीचा हा प्रकार समोर आला. संशयिताने याप्रकारे अनेकांना गंडविल्याचे बोलले जात असून अधिक तपास सहाय्यक निरीक्षक शिंदे करीत आहेत.