नाशिक (इंडिया दर्पण वृत्तसेवा) – शहरातील नॉयलॉन मांजा विक्रेत्यांवर पोलिसांनी शुक्रवारी वेगवेगळय़ा भागात टाकलेल्या छापासत्र चार जणांवर कारवाई करुन २१ हजार रूपये किमतीचा नॉयलान मांजा जप्त केला. याप्रकरणी आडगाव, गंगापूर, उपनगर व पंचवटी पोलिस ठाण्यात गुन्हे दाखल करण्यात आले आहेत. पहिली कारवाई जेलरोड भागात करण्यात आली. हर्षल शत्रुघ्न कर्डक (१९ रा. प्राईड लिला अपा.भिमनगर) हा युवक आपल्या घर परिसरात नॉयलॉन मांजा विक्री करतांना आढळून आला. संशयिताच्या ताब्यातून १ हजार २०० रूपये किमतीचा मांजा जप्त करण्यात आला असून, याप्रकरणी पोलिस शिपाई राहूल जाधव यांनी दिलेल्या तक्रारीवरून उपनगर पोलिस ठाण्यात गुन्हा दाखल करण्यात आला आहे. अधिक तपास जमादार गांगुर्डे करीत आहेत. तर दुसरी कारवाई गंगाघाट भागात करण्यात आली. येथे विकास राजेश हळोदीया (२५ रा.सातभाई नगर,जेलरोड) हा युवक शुक्रवारी दुपारच्या सुमारास गंगाघाटावरील यशवंतराव पटांगणात बेकायदा नॉयलॉन मांजा विक्री करतांना मिळून आला. त्याच्या ताब्यातून सुमारे नऊ हजार रूपये किमतीचे १८ गट्टू जप्त करण्यात आले असून संशयितास अटक करण्यात आली आहे. याप्रकरणी पोलिस शिपाई गोरक्ष साबळे यांनी दिलेल्या तक्रारीवरून पंचवटी पोलिस ठाण्यात गुन्हा दाखल करण्यात आला असून अधिक तपास पोलिस नाईक डि. पी. नाईक करीत आहेत. तिसरी कारवाई बळी मंदिर चौक ते बळी महाराज टी स्टॉल दुकानाकडे जाणा-या मार्गावर करण्यात आली. येथे तनिश सुनिल ताडे (१८ रा.वृंदावन कॉलनी,अमृतधाम) हा युवक गुरूवारी रात्री नॉयलॉन मांजा विक्री करतांना मिळून आला. संशयिताच्या ताब्यातून तीन हजार रूपये किमतीचे पाच रिळ हस्तगत करण्यात आले असून याप्रकरणी पोलिस नाईक दादासाहेब वाघ यांनी दिलेल्या तक्रारीवरून आडगाव पोलिस ठाण्यात गुन्हा दाखल करण्यात आला आहे. अधिक तपास हवालदार नरवडे करीत आहेत. चौथी कारवाई सावरकरनगर भागात करण्यात आली. हितेश परशुराम चव्हाण (२२ रा.सातपूर कॉलनी) हा युवक शुक्रवारी सायंकाळच्या सुमारास सावरकर नगर येथील गॅलेक्सी क्रिकेट टर्फ समोर नॉयलॉन मांजा विक्री करतांना मिळून आला. त्याच्या ताब्यातून सात हजार ८०० रूपये किमतीचा नॉयलॉन मांजा जप्त करण्यात आला असून याप्रकरणी अंमलदार वाघचौरे यांनी दिलेल्या तक्रारीवरून गंगापूर पोलिस ठाण्यात गुन्हा दाखल करण्यात आला आहे. अधिक तपास पोलिस नाईक परदेशी करीत आहेत.
