नाशिक (इंडिया दर्पण वृत्तसेवा) – हिरावाडीकडून भूजबळ नॉलेज सिटीकडे जाणा-या मार्गावर कारमधून प्रवास करणा-या महिलेच्या गळयातील मंगळसूत्र व राणीहार दुचाकीस्वार भामट्यांनी ओरबाडून नेल्याची घटना घडली.
याप्रकरणी पंचवटी पोलीस ठाण्यात जबरीचोरीचा गुन्हा दाखल करण्यात आला आहे. वंदना संतोष शिंदे (३० रा.जाखोरी ता.सिन्नर) यांनी याप्रकरणी तक्रार दाखल केली आहे. शिंदे दांम्पत्य शुक्रवारी (दि.१७) शहरात आले होते.
दुपारच्या सुमारास दांम्पत्य परतीच्या प्रवासास लागले असता ही घटना घडली. हिरावाडीकडून भूजबळ नॉलेज सिटी कॉलेजकडे जाणा-या मार्गाने पती -पत्नी कारमधून प्रवास करीत होते.
पाटालगतच्या वाघाडी नदी पुल परिसरात शिंदे या पाठीमागील सिटावर खिडकीची काच उघडी करून बसलेल्या असतांना कमलनगर बाजूकडून पल्सरवर आलेल्या हेल्मेटधारी दोघांपैकी एकाने धावत्या कारच्या खिडकीत हात घालून त्यांच्या गळ्यातील मंगळसूत्र आणि राणीहार असा सुमारे १ लाख ८८ हजाराचा ऐवज हिसकावून पोबारा केला. अधिक तपास सहाय्यक निरीक्षक केदार करीत आहेत.
