नाशिक (इंडिया दर्पण वृत्तसेवा) – गंगापूररोडवरील बारदान फाटा भागात कारने अचानक वळण घेतल्याने दुचाकी आदळून झालेल्या अपघातात पाठीमागे डबलसिट बसलेल्या तरूणाचा मृत्यू झाला. आनंद हिरामण ब्राम्हणे (२० रा.शिवनेरीनगर,सोमेश्वर) असे मृत दुचाकीस्वाराचे नाव आहे. याप्रकरणी कारचालकाविरूध्द गंगापूर पोलिस ठाण्यात अपघाताचा गुन्हा दाखल करण्यात आला आहे. याप्रकरणी दिपक शेवरे (१७) या युवकाने तक्रार दाखल केली आहे. शेवरे व ब्राम्हणे हे दोघे मित्र २० फेब्रुवारी रोजी रात्री गंगापूररोडने आपल्या स्कुटीवर ( एमएच १५ सीएच २०४१) डबलसिट प्रवास करीत होते. बारदानफाट्याकडून गंगापूररोडने कवडे गार्डनच्या दिशेने जाणा-या एमएच १५ एचसी ८५७१ वरील कारचालकाने आपले वाहन अचानक वळविल्याने हा अपघात झाला. पाठीमागून भरधाव स्कूटी कारवर धडकल्याने दोघे मित्र जखमी झाले होते. त्यातील दुचाकीवर पाठीमागे बसलेल्या ब्राम्हणे याच्या डोक्यास गंभीर दुखापत झाल्याने त्यास गुरूजी हॉस्पिटल येथे प्रथमोपचार करून अधिक उपचारार्थ आडगाव मेडिकल कॉलेज येथे दाखल केले असता गुरूवारी (दि.२) उपचार सुरू असतांना डॉ.अथर्व चौखंडे यांनी त्यास मृत घोषीत केले. याबाबत कारचालक किशोर अरूण पठाडे (रा.गंगापूरगाव) याच्याविरूध्द पोलिस दप्तरी गुन्हा दाखल करण्यात आला असून अधिक तपास सहाय्यक निरीक्षक शिंदे करीत आहेत.
