नाशिक विमानतळाजवळ नागपूरच्या सीमा शुल्क विभागाची कारवाई
नाशिक (इंडिया दर्पण वृत्तसेवा) – दुबईमधून सुक्या खजुराच्या नावाखाली आयात केलेल्या ३३ टन सुपारीची तस्करी करणा-या व्यापा-याला अटक करण्यात आली आहे. या व्यापा-यास न्यायालयासमोर हजर केल्यानंतर त्याला दोन दिवसाची पोलिस न्यायालयीने कोठडी सुनावण्यात आली आहे. नागपूर सीमा शुल्क विभागाने ही तस्करी उघडकीस आणली आहे. अडीच कोटी रुपयांची सुपारी असून बाजारात हिची किंमत अधिक असल्याचे अधिकाऱ्यांनी सांगितले. नाशिक विमानतळाजवळील जानोरी कार्गो हब असून येथे ही कारवाई करण्यात आली.
याप्रकरणी पीके इंटरप्राईजेसचे संचालक प्रथमेश विजय काटकर या व्यापाऱ्याला अटक करण्यात आली आहे. नागपूर सीमा शुल्क विभागाने कार्गो हबवर सहा कंटेनरची तपासणी केल्यानंतर हे तस्करी प्रकरण समोर आले आहे. या तपासणीत ३३ टन सुपारी आढळली. या सुपारीचे बाजारमूल्य तब्बल २ कोटी ४८ लाख रुपये असून दंड आकारणीसह त्याची एकूण किंमत ६ कोटी ४१ लाख रुपये असल्याचे पथकाने सांगितले. दुबई येथील जुबेर अली यांच्या नावाने हे कंटेनर बुक करण्यात येत होते. या या तस्करी प्रकरणी सीमा शुल्क कायदा १९६२ च्या तरतुदीनुसार दंड आकारणी करून गुन्हा नोंदवण्यात आला आहे. त्याचप्रमाणे मुंबई व नाशिक येथील गोदाम व कार्यालयांवर छापे टाकून आक्षेपार्ह कागदपत्रेही जप्त केली आहे.
