नाशिक (इंडिया दर्पण वृत्तसेवा) – नाशिक- नांदूरनाका येथे खासगी बसच्या भीषण अपघातात १२ प्रवाशांचा मृत्यू तर ३४ प्रवाशी जखमी झाले आहे. या अपघातात मृत झालेल्या प्रवाशांची ओळख पटत नसल्याने संबंधित मृतांच्या ओळखीसाठी डीएनए टेस्ट करण्यात येणार असल्याची माहिती नाशिकचे जिल्हाधिकारी गंगाथरण डी यांनी दिली. या अपघातानंतर जिल्हाधिकारी कार्यालयाकडून मदत कक्ष तयार करण्यात आले असून दोन टोल फ्री नंबरही देण्यात आले आहेत.
पहाटे झालेल्या या अपघातात १२ प्रवाशांचा मृत्यू तर ३४ प्रवाशी जखमी झाले आहे. मिरची हॅाटेलजवळ येथील चौफुलीवर पहाटे ५ वाजता ही घटना घडली आहे. ट्रेलर व बसमध्ये हा अपघात झाला. ही बस यवतमाळहून मुंबईकडे जात असतांना ही दुर्दैवी घटना घडली. ही घटना झाल्यानंतर अनेक प्रवाशी झोपेत होते. स्लिपर कोच असल्यामुळे अनेक प्रवाशांना उठण्यास वेळ लागला. काही प्रवाशी उतरले. यातील जखमी प्रवाशांना जिल्हा रुग्णालयात नेण्यात आले. या गाडीत ४८ प्रवाशी असल्याचे सांगण्यात येत आहे. ही गाडी चिंतामणी ट्रव्हल्सची असल्याचे सांगण्यात आले. घटनेची माहिती मिळाल्यानंतर पोलिस व अग्निशमन दलाचे जवान घटनास्थळी दाखल झाले. या आगीत बस जळून खाक झाली आहे.
या घटनेनंतर मुख्यमंत्री एकनाथ शिंदे हे दुपारी अपघातस्थळी भेट देणार आहे. या दुर्घटनेबद्दल मुख्यमंत्री एकनाथ शिंदे यांनी तीव्र दुःख व्यक्त केले आहे. या दुर्दैवी घटनेतील मृतांच्या नातेवाईकांना ५ लाख रुपयांची मदत शासनाच्या वतीने जाहीर करण्यात आली आहे. या अपघातातील जखमींवर शासकीय खर्चाने तातडीचे वैद्यकीय उपचार करण्याचे निर्देश मुख्यमंत्री एकनाथ शिंदे यांनी दिले आहेत. नाशिक येथील अपघाताच्या कारणांचा शोध घेतला जाईल, असेही मुख्यमंत्र्यांनी सांगितले.
पहाटे नाशिक शहरामध्ये ट्रेलर व ट्रॅव्हल बस यांच्यामध्ये झालेल्या भीषण अपघातामुळे जखमी व मयत व्यक्ती विषयी अधिक माहिती संबंधितांना देण्यासाठी जिल्हाधिकारी कार्यालय आपत्ती व्यवस्थापन शाखा आणि जिल्हा सामान्य रुग्णालयाच्या वतीने जिल्हा सामान्य रुग्णालय नाशिक येथे नियंत्रण कक्ष स्थापन करण्यात आलेला असून सदर नियंत्रण कक्षाचे दुरध्वनी क्रमांक खालील प्रमाणे आहेत .
+912532572038
+912532576106
जिल्हाधिकारी कार्यालय नाशिक
Nashik Bus Fire Accident Collector DNA Test
