मुंबई – देशातील सर्वात मोठी विमा कंपनी असलेल्या लाइफ इन्शुरन्स कॉर्पोरेशन ऑफ इंडिया (एलआयसी) च्या आयपीओची अनेक जण डोळ्यात तेल घालून प्रतिक्षा करीत आहेत. या सर्वांसाठी एक महत्त्वाची वार्ता आङे. पुढच्या महिन्यात म्हणजे डिसेंबर महिन्यात एलआयसीच्यावतीने आयपीओसाठी सेबीकडे ड्राफ्ट पेपर सादर करणार आहे. त्यामुळे गुंतवणूकदारांसाठी ही चांगली संधी आहे. येत्या २ ते ३ महिन्यात या संधीचा अनेकांना लाभ घेता येणार आहे.
डिसेंबरमध्ये कधी होणार?
एका अहवालानुसार, सदर मसुदा IPO प्रॉस्पेक्टस डिसेंबरच्या पहिल्या आठवड्यात बाजार नियामकाकडे सादर केला जाण्याची शक्यता आहे. मात्र, अद्यापपर्यंत एलआयसीकडून अधिकृत माहिती देण्यात आलेली नाही. मात्र, मसुदा सादर झाल्यानंतर सुमारे एक ते दीड महिन्यांचा कालावधी लागू शकतो. अशा परिस्थितीत एलआयसीचा आयपीओ जानेवारी किंवा फेब्रुवारीच्या शेवटच्या आठवड्यात येण्याची शक्यता आहे.
आयपीओ (IPO) म्हणजे काय?
आयपीओ म्हणजे इनिशियल पब्लिक ऑफरिंग होय. एखादी कंपनी पहिल्यांदा कंपनीचे शेअर्स खरेदी करण्याची संधी सामान्य जनतेला देते, तेव्हा ही प्रक्रिया आयपीओद्वारेच पूर्ण होते. आयपीओ लाँच आणि शेअर्सचे वाटप झाल्यानंतर कंपनीची यादी केली जाते. साधारणपणे कोणत्याही कंपनीच्या आयपीओची सुरुवातीची किंमत कमी असते. तथापि, शेअर बाजारात लिस्टिंग केल्यानंतर, त्याच्या शेअरच्या किमती बाजारानुसार वाढत किंवा कमी होत राहतात.
गुंतवणूक कशी करावी?
आयपीओच्या दृष्टीकोनातून २०२१ हे वर्ष खूप चांगले मानले जात आहे. कारण यावर्षी अनेक कंपन्यांचे आयपीओ बाजारात आले आहेत. येत्या काही दिवसात सुमारे अनेक कंपन्या त्यांचा IPO लाँच करणार आहेत. प्रत्येक कंपनी गुंतवणूकदारांसाठी काही कालावधीसाठी आयपीओ खुली ठेवते. साधारणपणे हा कालावधी ७ दिवसांचा असतो. या दरम्यान, गुंतवणूकदार कंपनीच्या वेबसाइटवर किंवा नोंदणीकृत दलालीद्वारे त्या कंपनीच्या IPO मध्ये गुंतवणूक करू शकतो.
IPO मध्ये गुंतवणूक करायची आहे? बघा, तज्ज्ञ काय सांगताय https://t.co/omuOOfz25f
— India Darpan Live (@IndiaDarpanLive) November 18, 2021
अँकर गुंतवणूकदारांशी चर्चा
एका अहवालानुसार, बँकर्स पुढील आठवड्यात LIC च्या IPO मध्ये संभाव्य अँकर गुंतवणूकदारांपर्यंत पोहोचण्यास सुरुवात करतील. तसेच बँकर्सना हे निश्चित करायचे आहे की, देशातील सर्वात मोठ्या शेअर विक्रीसाठी पुरेशी मागणी आहे काय ? अर्थ तज्ज्ञांच्या म्हणण्यानुसार, सुमारे १०० जागतिक गुंतवणूकदारांच्या नावांची यादी १० बँकांशी शेअर करण्यात आली आहे.
देशातील सर्वात मोठा IPO
एलआयसीचा हा देशातील सर्वात मोठा IPO मानला जात आहे. याद्वारे सरकार LIC मधील १० टक्क्यांहून अधिक स्टेक विकू शकते. जागतिक गुंतवणूकदारांनाही या IPO मध्ये अँकर गुंतवणूकदार म्हणून प्रवेश मिळण्याची शक्यता आहे. केंद्र सरकारला या IPO मधून एक लाख कोटी रुपये उभे करायचे आहेत. यापुर्वी पेटीएम हा आतापर्यंतचा सर्वात मोठा आयपीओ मानला जातो. पेटीएमच्या आयपीओमधून कंपनीने १८ हजार ६००कोटी रुपये उभे केले आहेत.
