टाटा सन्सचे माजी अध्यक्ष व उद्योगपती सायरस मिस्त्री यांचे अपघाती निधन

मुंबई (इंडिया दर्पण वृत्तसेवा) – टाटा सन्सचे माजी अध्यक्ष आणि ज्येष्ठ उद्योगपती सायरस मिस्त्री यांचे रस्ता अपघातात आज निधन झाले आहे. पालघरजवळ हा अपघात झाल्याचे सांगण्यात येत आहे. अपघातानंतर त्यांना रुग्णालयात नेले. मात्र, डॉक्टरांनी त्यांना मृत घोषित केले. मुंबई-अहामदाबाद महामार्गावर हा अपघात झाला. हा अपघात एवढा भीषण होता की मिस्त्री यांच्या कारचा अक्षरशः चक्काचूर झाला आहे.

मिस्त्री हे अहमदाबादहून मुंबईला येत होते. त्यावेळी हा भीषण अपघात झाला. आज दुपारी साडेतीन वाजेच्या सुमारास हा अपघात झाल्याचे पालघर पोलिसांनी सांगितले आहे. मिस्त्री हे त्यांच्या वाहन चालकासह प्रवास करीत होते. त्यांची आलिशान मर्सिडीज कार दुभाजकावर जोरदार आदळली. त्यामुळे हा अपघात झाला. या अपघातात मिस्त्री यांच्यासह त्यांच्या चालकाचा मृत्यू झाला आहे. पालघर जिल्हा पोलिस अधिक्षकांनी या वृत्तास दुजोरा दिला आहे.

पोलिसांनी दिलेल्या माहितीनुसार, या अपघातात सायरस आणि त्यांचा ड्रायव्हर ठार झाला तर दोन जण जखमी झाले. त्यांचे वडील आणि मोठे उद्योगपती पल्लोनजी मिस्त्री यांचे या वर्षी २८ जून रोजी निधन झाले. मीडिया रिपोर्ट्सनुसार, ड्रायव्हिंग सीटवर एक महिला होती. मिस्त्री बाजूच्या सीटवर बसले होते. मागे आणखी दोन जण बसले होते. अपघात एवढा भीषण होता की कारचा पुढील भाग चक्काचूर झाला. हा अपघात कसा झाला हे अद्याप समजू शकलेले नाही.

सायरस हे टाटा समूहाचे सहावे अध्यक्ष होते. काही वादांमुळे त्यांना चार वर्षांतच अध्यक्षपदावरून हटवण्यात आले. यानंतर रतन टाटा यांनी स्वतः अंतरिम अध्यक्षपदाची सूत्रे स्वीकारली. नंतर २०१७ मध्ये एन चंद्रशेखरन यांना हे पद देण्यात आले.

https://twitter.com/tiwariavinash/status/1566382829122240518?s=20&t=mefV0H2yIOKaoE_q-9Rerg

सायरस मिस्त्री यांच्याविषयी
सायरस मिस्त्री हे ज्येष्ठ उद्योगपती पल्लोनजी मिस्त्री यांचे सुपूत्र आहेत. मुंबईत त्यांचा जन्म झाला. त्यांचे शिक्षण लंडन बिझनेस स्कूलमध्ये झाले होते. शिवाय त्यांनी लंडनच्याच इम्पिरियल कॉलेजमधून पदवीचे शिक्षण घेतले होते. सायसर २००६ मध्ये टाटा उद्योग समूहाचे सदस्य बनले. २०१३ मध्ये म्हणजे वयाच्या ४३ व्या वर्षी ते टाटा समुहाचे अध्यक्ष बनले. मात्र, २०१६ मध्ये या टाटा समुहात मोठा वाद निर्माण झाला. त्यानंतर त्यांना अध्यक्षपदावरुन हटवण्यात आले होते. या निर्णयाविरोधात ते न्यायालयात गेले. पण, त्याच्या विरोधात निकाल लागला.

सायसर हे शापूरजी पालोनजी उद्योग समूहाचे व्यवस्थापकीय संचालक होते. त्यांनी या उद्योग समुहाचे उत्तमरित्या नेतृत्व केले आणि वेगळी दिशा दिली. पालोनजी ग्रुप विविध क्षेत्रात कार्यरत आहे. कापड, रिअल इस्टेट, हॉस्पिटॅलिटी, बिझनेस ऑटोमेशन अशा विविध क्षेत्रांचा समावेश आहे. त्यांच्या निधनाने उद्योग जगताला मोठा धक्का बसला आहे.

Industrialist Cyrus Mistry Road Accident Death
Palghar Car Shapoorji Pallonji Industry Group