मुंबई – सरकारी असो की खासगी बँक ग्राहकांसाठी नवनवीन नियमावली तयार करत असतात. काहीवेळा हे नियम ग्राहकांच्या हिताचे किंवा फायद्याचे असतात. परंतु काही वेळा ग्राहकांना ते बंधनकारक देखील किंवा जाचक देखील वाटू शकतात. परंतु बँकेने केलेले कोणतेही नियम ग्राहकांना बंधनकारक असतात. आयसीआयसीआय (ICICI) बँकेचे ग्राहक असलेले ज्येष्ठ नागरिक व सर्व सामान्य ग्राहकांच्या बचत खात्याशी संबंधित दोन नवीन नियम केले असून सदर बँकेचे ग्राहक असलेल्यांसाठी ही माहिती जाणून घेणे आवश्यक आहे. कोणते आहेत ते दोन नियम जाणून घेऊ या…
गोल्डन इयर्स एफडीची अंतिम मुदत वाढ
कोरोना महामारीच्या काळात बँकेने ‘गोल्डन इयर्स एफडी’ ही विशेष मुदत ठेव योजना सुरू केली. या अंतर्गत ICICI बँक ज्येष्ठ नागरिकांना सामान्य व्यतिरिक्त व्याज देत आहे. आता त्याची अंतिम मुदत दि. 8 एप्रिल 2022 पर्यंत वाढवण्यात आली आहे. ज्येष्ठ नागरिकांसाठी निवडलेल्या मॅच्युरिटी कालावधीसह FD वर एकूण व्याज सामान्यपेक्षा 0.80 टक्के जास्त आहे.
बचत खात्यावरील सेवा शुल्क
नवीन वर्षाच्या पहिल्या दिवसापासून म्हणजेच दि. 1 जानेवारीपासून, ICICI बँकेने बचत खात्यावरील सेवा शुल्क वाढवण्याचा निर्णय घेतला आहे. याशिवाय बँक इतर शुल्क वाढवणार आहे. सध्या एटीएममधून 5 आर्थिक व्यवहार मोफत आहेत. यानंतर प्रत्येक आर्थिक व्यवहारासाठी 20 रुपये शुल्क आकारले जाते. मात्र, नवीन वर्षाच्या पहिल्या दिवसापासून म्हणजेच दि. 1 जानेवारीपासून प्रति व्यवहारासाठी 21 रुपये मोजावे लागतील. आयसीआयसीआय बँक नसलेल्या एटीएममधून होणाऱ्या व्यवहारांवरही पुढील वर्षापासून अतिरिक्त शुल्क आकारले जाईल.
