आडगाव शिवारात घरफोडी; चोरट्यांनी पावणे दोन लाखाच्या ऐवजावर मारला डल्ला
नाशिक : शहरात घरफोडीचे सत्र सुरूच असून आडगाव शिवारात झालेल्या एका घरफोडीत चोरट्यांनी पावणे दोन लाखाच्या ऐवजावर डल्ला मारला. त्यात सोन्याचांदीच्या दागिण्यांसह रोकडचा समावेश आहे. याप्रकरणी आडगाव पोलीस ठाण्यात घरफोडीचा गुन्हा दाखल करण्यात आला आहे.सविता किरण थोरात (रा.प्रभात कॉलनी,शरायू पार्क) यांनी याप्रकरणी तक्रार दाखल केली आहे.थोरात कुटूंबिय ३० ऑक्टोबर ते १७ नोव्हेंबर दरम्यान बाहेरगावी गेले असता ही घटना घडली. अज्ञात चोरट्यांनी बंद घराचे कुलूप तोडून बेडरूममधील कपाटातून सोायाचांदीचे दागिणे व रोकड असा सुमारे १ लाख ७० हजार रूपये किमतीचा ऐवज चोरून नेला. अधिक तपास उपनिरीक्षक जाधव करीत आहेत.
लॅपटॉप असलेली बॅग पल्सरस्वाराने केली लंपास
नाशिक : धावत्या दुचाकीस अडकविलेली लॅपटॉप असलेली बॅग काढून पल्सरस्वाराने पोबारा केल्याची घटना नाशिक पुणा मार्गावर घडली. दुचाकीचालकाचे लक्ष विचलीत करून बँग लांबविली असून याप्रकरणी मुंबईनाका पोलीस ठाण्यात चोरीचा गुन्हा दाखल करण्यात आला आहे. प्रितम रत्नाकर रोकडे (रा.प्रशांतनगर,पाथर्डी फाटा) या तरूणाने याप्रकरणी तक्रार दाखल केली आहे. रोकडे मंगळवारी (दि.१६) सायंकाळी आपल्या दुचाकीवर नाशिक पुणा रोडने प्रवास करीत असतांना ही घटना घडली. कृष्णा लॉन्स जवळ पाठीमागून आलेल्या पल्सरस्वाराने तुझे नाव आकाश आहे का ? अशी विचारणा करीत लक्ष विचलीत करून रोकडे यांच्या दुचाकीस अडकविलेली लॅपटॉप असलेली बॅग पळवून नेली. याबॅगेत लॅपटॉपसह,मोबाईल व महत्वाचे कागदपत्र असा सुमारे ३० हजाराचा ऐवज होता. अधिक तपास हवालदार घुगे करीत आहेत.