दुकान फोडून चोरट्यांनी गल्यातील ४५ हजाराच्या रोकडसह सिगारेटचे पाकिट केले लंपास
नाशिक : शहरात भुरट्या चो-या वाढल्या असून दुकान फोडून चोरट्यांनी गल्यातील ४५ हजाराच्या रोकडसह सिगारेट पाकिटे चोरून नेल्याची घटना देवळाली गावात घडली. याप्रकरणी उपनगर पोलीस ठाण्यात घरफोडीचा गुन्हा दाखल करण्यात आला आहे. सुमित रत्नाकर कुलकर्णी (रा.लॅमरोड ना.रोड) यांनी तक्रार दाखल केली आहे. कुलकर्णी यांचे देवळाली गावातील धनगर गल्लीत सिध्दीविनायक नावाचे किराणा दुकान आहे. रविवारी (दि.१४) रात्री अज्ञात चोरट्यांनी दुकानाचे शटर वाकवून ही चोरी केली. दुकानात शिरलेल्या चोरट्यांनी गल्यातील ४५ हजार २४० रूपयांची रोकड व ५० सिगारेटची पाकिटे असा सुमारे ४८ हजार २४० रूपये किमतीचा ऐवज चोरून नेला. अधिक तपास हवालदार सातभाई करीत आहेत.
