पुणे (इंडिया दर्पण वृत्तसेवा) – “सरस्वतीने आम्हाला शिकवलं नाही मग शाळेत सरस्वतीची पूजा का करायची?”, असा वादग्रस्त सवालच राष्ट्रवादीचे नेते छगन भुजबळ यांनी उपस्थित केला आहे. भुजबळ यांच्या या वक्तव्यावर ब्राम्हण महासंघाचे अध्यक्ष आनंद दवे यांनी आक्षेप घेतला आहे.
सत्यशोधक समाजाचा शतकोत्तर सुवर्ण महोत्सव नुकताच पार पडला. यावेळी आयोजित अखिल भारतीय महात्मा फुले समता परिषदेच्या कार्यक्रमात बोलताना भुजबळ यांनी देवी सरस्वतीवरुन वादग्रस्त वक्तव्य केले आहे. शाळेत सरस्वती देवीची पूजा का करायची? असा सवाल छगन भुजबळ यांनी उपस्थित केला आहे. सरस्वतीने आम्हाला शिकवले नाही असेही भुजबळ म्हणाले. देवी सरस्वतीला कुणी पाहिले आहे का? पाहिले असेल तरी फक्त ३ टक्के लोकांना सरस्वती देवीने शिकवले असेल असं भुजबळ म्हणाले. शाळेत सरस्वतीचा फोटो का पाहिजे, शाळांमध्ये फुले, आंबेडकर, कर्मवीर भाऊराव पाटलांचे फोटो लावा अशी मागणीही भुजबळांनी केली.
आनंद दवे यांनी भुजबळ यांच्या विधानावर प्रतिक्रिया दिली आहे. देवी सरस्वतीवरुन केलेल्या वादग्रस्त वक्तव्याबाबत छगनजी भुजबळ यांनी हिंदूंची माफी मागावी अशी मागणी दवे यांनी केली आहे. फुले दाम्पत्यांचे फोटो शाळेत असायलाच हवे, बाबासाहेबांचे पण असावेत. पण सरस्वती माता, शारदा मातेला छगनजी यांचा आक्षेप का? असा सवाल दवे यांनी उपस्थित केला आहे. सरस्वती, शारदा यांना कोणीच पाहिले नाही. उद्या गणपतीचे फोटो पण नाकारणार का, हिंदू दैवतांचाच यांना राग का आहे असा सवालही दवे यांनी उपस्थित केला आहे.
Chhagan Bhujbal Controversial Statement Politics
