इंडिया दर्पण ऑनलाईन डेस्क – चित्रपटसृष्टीतील कलाकार काही न काही कारणाने सातत्याने चर्चेत असतात. मात्र, यात त्यांच्याबद्दलच्या चांगल्या गोष्टी कमी आणि इतर गोष्टीच जास्त ऐकू येत असतात. अशा प्रकारचं गॉसिप हे काही या कलाकारांसाठी नवीन नाही. बॉलिवूडमधील एक प्रसिद्ध अभिनेत्यावर त्याच्याच जुन्या प्रेयसीने गंभीर आरोप केले आहेत. त्यामुळेच पुन्हा एकदा हा अभिनेता आणि त्याची जुनी प्रेयसी चर्चेत आले आहेत. बॉलीवूड अभिनेत्री सोमी अली हिने पुन्हा एकदा बॉलिवूडचा ‘दबंग’ खान सलमान खानवर आरोप केले आहेत. सोमीने सलमानसोबतचा जुना फोटो शेअर करत त्याच्यावर मारहाणीचा आरोप केला. गंमत म्हणजे, या आरोपांनंतर काही वेळाने तिने ही पोस्ट डिलिट केली. सोमी ही सलमान खानची एक्स-गर्लफ्रेंड होती असं म्हटलं जातं. या दोघांचं नातं काही फार काळ टिकू शकलं नाही. मात्र त्यांच्या अफेअरच्या चर्चा आजही रंगतात. याआधीही सोमीने सलमानवर गंभीर आरोप केले होते.
सलमान खानवर आरोप करताना सोमीने एक जुना फोटो पोस्ट केला. यामध्ये सलमान तिला गुलाबाचं फूल देताना दिसतोय. या फोटोच्या कॅप्शनमध्ये तिने लिहिलं, ‘आता बरंच काही घडणार आहे. भारतात माझा शो बंद करण्यात आला आणि मला धमकावलं. तू भित्रा आहेस. इथे माझ्या सुरक्षेसाठी ५० वकील उभे आहेत, जे मला सिगारेटच्या चटक्यांपासून आणि शारीरिक शोषणापासून वाचवतील. जे तू माझ्यासोबत बरीच वर्षे करत होतास. जे महिलांना मारहाण करणाऱ्या व्यक्तीची साथ देतात, त्या सर्व अभिनेत्रींना लाज वाटली पाहिजे. तसेच, जे त्याची साथ देतात, अशा अभिनेत्यांनाही लाज वाटली पाहिजे. आता लढण्याची वेळ आली आहे’, अशी धक्कादायक पोस्ट तिने केली आहे. सोमी अलीची ही पोस्ट सोशल मीडियावर क्षणार्धात व्हायरल झाली. काही वेळाने मात्र तिने ही पोस्ट डिलिट केली. सोमीने ही पोस्ट डिलिट का केली, हे अद्याप स्पष्ट होऊ शकलं नाही. मात्र तिच्या या पोस्टमुळे बॉलिवूड आणि सोशल मीडियावर चांगलाच गोंधळ निर्माण झाला आहे.
सोमी आणि सलमान खान जेव्हा रिलेशनशिपमध्ये होते, तेव्हा सलमानची ऐश्वर्यासोबतची जवळीक वाढली होती. सलमान त्यावेळी ‘हम दिल दे चुके सनम’ या चित्रपटाचं शूटिंग करत होता. त्यानंतर ऐश्वर्यानेही सलमानवर मारहाण आणि फोनवर धमकी दिल्याचा आरोप केला होता. पाकिस्तानी वंशाच्या सोमी अलीने सांगितलं होतं की, ती फक्त सलमानसाठी भारतात आली होती. जेणेकरून नंतर ती सलमानसोबत लग्न करू शकेल. पण जवळपास ८ वर्षांच्या रिलेशनशिपनंतर त्यांचं नातं तुटलं. १९९१ ते १९९७ दरम्यान, सोमी अलीने १० हून अधिक चित्रपट आणि जाहिरातींमध्ये काम केलं होतं. सध्या ती परदेशात एक एनजीओ चालवते.
Actor Salman Khan Ex Girlfriend Allegations