नवी दिल्ली (इंडिया दर्पण वृत्तसेवा) – संपूर्ण महाराष्ट्रासाठी आणि मराठीजनांसाठी आज अतिशय अबिमानाचा आणि कौतुकाचा दिवस आहे. कारण न्यायमूर्ती उदय उमेश लळित हे देशाचे सरन्यायाधीश झाले आहेत. राष्ट्रपती भवनात राष्ट्रपती द्रौपदी मुर्मू यांनी लळित यांना पद व गोपनियतेची शपथ दिली. लळित हे महाराष्ट्रात जन्मलेले आहेत. त्यामुळे महाराष्ट्रवासियांसाठी ही एक अभिमानाची बाब आहे.
न्यायमूर्ती लळित हे भारताचे ४९ वे सरन्यायाधीश आहेत. एन व्ही रमणा यांच्या सेवानिवृत्तीनंतर लळित यांनी सर्वोच्च न्यायालयाचे प्रमुख म्हणून कार्यभार स्वीकारला आहे. ज्येष्ठतेच्या आदेशानुसार न्यायमूर्ती लळित हे सरन्यायाधीश झाले आहेत. न्यायमूर्ती लळित हे तिहेरी तलाकसारखे महत्त्वाचे निर्णय देणार्‍या खंडपीठाचा एक भाग आहेत ज्याचा देशाच्या सामाजिक व्यवस्थेवर मोठा परिणाम झाला आहे.
न्यायमूर्ती लळित हे देशातील दुसरे सरन्यायाधीश आहेत, जे बार कौन्सिलमधून न्यायाधीश बनले आणि नंतर त्यांना सरन्यायाधीश होण्याची संधी मिळाली. यापूर्वी हे मार्च १९६४ मध्ये घडले होते. तेव्हा न्यायमूर्ती एस एम सिक्री यांना बार कौन्सिलमधून न्यायाधीश होण्याची संधी मिळाली. त्यानंतर ते १९७१ मध्ये सरन्यायाधीश देखील झाले. न्यायमूर्ती लळित हे देशातील प्रख्यात वकिलांपैकी एक आहेत आणि त्यांची १३ ऑगस्ट २०१४ रोजी सर्वोच्च न्यायालयाचे न्यायाधीश म्हणून नियुक्ती करण्यात आली होती. तेव्हापासून ते सर्वोच्च न्यायालयाच्या अनेक महत्त्वाच्या निर्णयांचा भाग आहेत.
केरळमधील पद्मनाभ स्वामी मंदिराच्या देखभालीशी संबंधित प्रकरणातही त्यांनी हा निकाल दिला होता. इतकेच नाही तर POCSO कायद्याबाबत महत्त्वपूर्ण निर्णय देणाऱ्या खंडपीठाचेही न्यायमूर्ती लळितहे सदस्य होते. या निकालात असे म्हटले आहे की, जर कोणी चुकीच्या हेतूने मुलाच्या खाजगी भागाला स्पर्श केला तर तो देखील POCSO कायद्याच्या कलम ७ अंतर्गत लैंगिक छळ म्हणून गणला जाईल. या निर्णयान्वये सर्वोच्च न्यायालयाने मुंबई उच्च न्यायालयाचा आदेश बाजूला ठेवला होता, ज्यामध्ये त्वचेशी संपर्क नसल्यास तो लैंगिक छळ मानला जाणार नाही, असे म्हटले होते.
https://twitter.com/rashtrapatibhvn/status/1563390142546464769?s=20&t=tvDgmPK9V-Z9O818Eq_z_A
९ नोव्हेंबर १९५७ रोजी जन्मलेल्या न्यायमूर्ती लळित यांनी जून १९८३ मध्ये वकील म्हणून आपल्या कारकिर्दीला सुरुवात केली. १९८५ पर्यंत ते मुंबई उच्च न्यायालयाचे वकील होते. त्यानंतर १९८६ मध्ये ते दिल्लीत आले आणि एप्रिल २००४ मध्ये त्यांनी सर्वोच्च न्यायालयात वरिष्ठ वकील म्हणून प्रॅक्टिस सुरू केली. त्यांना टूजी स्पेक्ट्रम घोटाळ्यात सीबीआयचे विशेष सरकारी वकील म्हणून प्रतिनिधित्व करण्याची संधी मिळाली. न्यायमूर्ती लळित यांचा सरन्यायाधीश म्हणून कार्यकाळ फारच कमी असेल आणि ते येत्या ८ नोव्हेंबर रोजी निवृत्त होणार आहेत.
Justice U U Lalit Court CJI Supreme Court
Uday Lalit is Now Chief Justice of India
Marathi Maharastrian Advocate Triple Talaq
