नवी दिल्ली (इंडिया दर्पण वृत्तसेवा) – प्रजासत्ताक दिनापासून सर्वोच्च न्यायालयाचे निकाल महाठीसह विविध २२ भाषांमध्ये दिले जाणार आहेत. भारतीय अनुसूचित भाषांमध्ये निकाल देण्याच्या या सेवेबाबत सरन्यायाधीश डी. वाय. चंद्रचूड यांनी घोषणा केली आहे. सरन्यायाधीशांनी वकिलांसोबत बोलताना सांगितले की, सर्वोच्च न्यायालय अनुसूचित भाषांमध्ये विनामूल्य उपलब्ध निकाल उपलब्ध करून देण्यासाठी गुरुवारपासून इलेक्ट्रॉनिक-सुप्रीम कोर्ट रिपोर्टस् (ई-एससीआर) प्रकल्प कार्यान्वित केले जाणार आहे. त्यात सध्या जवळपास ३४ हजार निकाल उपलब्ध आहेत. शिवाय त्यात शोध सुविधाही (सर्च) आहे. सध्या प्रादेशिक भाषांमध्ये १,०९१ निवाडे आहेत जे प्रजासत्ताकदिनी उपलब्ध केले जाणार असल्याचेही त्यांनी सांगितले.
अनुसूचित समाविष्ट भाषा
भारतीय राज्यघटनेच्या आठव्या अनुसूचीमध्ये आसामी, बंगाली, गुजराती, हिंदी, कन्नड, काश्मिरी, कोकणी, मल्याळम, मणिपुरी, मराठी, नेपाळी, उडिया, पंजाबी, संस्कृत, सिंधी, तमिळ, तेलगू, उर्दू, बोडो, संथाली, मैथिली आणि डोगरी, अशा २२ भाषांचा समावेश आहे.
प्रथमतः मराठीतील १४ निकाल
सरन्यायाधिशांनी सांगितले की, सध्यास्थितीत ओरियामध्ये २१, मराठीमध्ये १४, आसामीमध्ये ४, कन्नडमध्ये १७, मल्याळममध्ये २९, नेपाळीमध्ये ३, पंजाबीमध्ये ४, तमिळमध्ये ५२, तेलगूमध्ये २८ आणि उर्दूमध्ये ३ निकाल उपलब्ध आहेत,’ असे सरन्यायाधीशांनी सांगितले. ई-एससीआर प्रकल्पाचा भाग म्हणून हे निकाल सर्वोच्च न्यायालयाच्या वेबसाइटवर, मोबाइल ॲपवर आणि नॅशनल ज्युडिशियल डेटा ग्रिडच्या (एनजेडीजी) जजमेंट पोर्टलवर उपलब्ध होणार असल्याचेही त्यांनी सांगितले.
Supreme Court Republic Day Gift 22 Languages