मुंबई – पेन्शनधारक तथा सेवानिवृत्तांसाठी दरवर्षी हयातीचा दाखला म्हणजेच जीवन प्रमाणपत्र बँकेत सादर करावे लागते. त्यानंतरच त्यांचे पेन्शन पुढे सुरू राहू शकते. त्यासाठी पेन्शनधारकांना बँकेत प्रत्यक्ष जाऊन दाखला द्यावा लागतो. परंतु वयोमानानुसार काही ज्येष्ठ नागरिकांना बँकेत जाऊन रांगेत उभे राहणे शक्य नसते. मात्र स्टेट बँक ऑफ इंडियाने पेन्शन धारकांना मोठा दिलासा देणारा निर्णय घेतला आहे. त्याची तत्काळ अंमलबजावणी सुरू झाली आहे.
जीवन प्रमाणपत्र सादर करण्याची शेवटची तारीख आता जवळ आली आहे. अशा एखाद्या पेन्शनधारकाने अद्याप जीवन प्रमाणपत्र सादर केले नसेल, तर काळजी करण्याची गरज नाही. स्टेट बँक ऑफ इंडिया आपल्या ग्राहकांना विशेष सुविधा देत आहे. कारण एसबीआयचे ग्राहक आता व्हिडीओ कॉलद्वारे घरबसल्या राहून जीवन प्रमाणपत्र सादर करू शकतील. पेन्शनधारकांना डिजिटल सुविधा उपलब्ध झाली असून कोविड-१९ च्या या काळात त्यांना बँक शाखेत न जाता घरी बसून जीवन प्रमाणपत्र सहज सादर करता येणार आहे.कशी ही संपूर्ण प्रक्रिया जाणून घेऊ या…
सर्वप्रथम पेन्शनधारकांना https://www.pensionseva.sbi/ ला भेट द्यावी लागेल.
– यानंतर ‘व्हिडिओ एलसी’ वर क्लिक करावे लागेल.
– तिसऱ्या टप्प्यात, SBI पेन्शन खाते क्रमांक टाकावा लागेल.
– यानंतर तुमच्या नोंदणीकृत मोबाईल नंबरवर एक OTP येईल.
– सर्व नियम आणि अटी काळजीपूर्वक वाचा आणि नंतर ‘स्टार्ट जर्नी’ वर क्लिक करावे लागेल.
– यानंतर, तुमचे पॅन कार्ड तुमच्याकडे ठेवा आणि ‘मी तयार आहे’ वर क्लिक करा.
– त्यानंतर व्हिडिओ कॉल सुरू करण्याची परवानगी द्यावी.
-सदर व्हिडिओ कॉल SBI अधिकाऱ्याच्या उपलब्धतेवर सुरू होईल.
– याशिवाय तुमच्या सोयीनुसार वेळही निवडू शकता.
– एकदा व्हिडिओ कॉल सुरू झाल्यानंतर, अधिकारी तुम्हाला तुमच्या स्क्रीनवर दिसणारा चार अंकी क्रमांक वाचण्यास सांगतील.
– तुम्हाला पॅनकार्ड दाखवावे लागेल त्यातून अधिकारी त्याचा फोटो घेऊ शकतील.
– यानंतर तुमचा फोटोही काढला जाईल. त्यानंतर सदर प्रक्रिया पूर्ण होईल.
