मुंबई (इंडिया दर्पण वृत्तसेवा) – अदानी उद्योग समूहाचे नाव कथित आर्थिक गैरव्यवहारात पुढे आल्यामुळे आता चहुबाजुंनी झडती सुरू झाली आहे. गुंतवणुकदारांचे टेंशन तर वाढलेच आहे, पण अदानी उद्योग समूहाला कर्ज देणाऱ्या बँकांचीही छाती आता धडधडायला लागली आहे. कारण तब्बल २१ हजार कोटी रुपयांचं कर्ज अदानी उद्योग समूहाच्या कंपन्यांवर आहे, अशी धक्कादायक माहिती उघडकीस आली आहे.
हिंडेनबर्गने अदानींच्या नावाचा गैरव्यवहारात उल्लेख करताच या उद्योग समूहाशी जुळलेल्या सर्वांचेच टेंशन वाढले. दोनच दिवसांत अदानीने मार्केटमधून एफपीओ गुंडाळला. त्यामुळे अधिकच गोंधळ उडाला. गुंतवणूकदारांनी तर आपले पैसे राहतील की जातील, अशी भितीच व्यक्त केली. अर्थात कंपनीचे सर्वेसर्वा गौतम अदानी यांनी स्वतः गुंतवणुकदारांना निश्चिंत राहण्याचा सल्ला दिला आहे. पण आता स्टेट बँक ऑफ इंडियाने अदानींच्या कंपन्यांवर असलेल्या कर्जाचा आकडा सांगून आणखी एक धक्का दिला आहे.
अदानी समूहाच्या कंपन्यांना २.६ बिलीयन डॉलर अर्थात २१ हजार कोटी रुपयांचे कर्ज देण्यात आल्याचे एसबीआयने सांगितले आहे. एसबीआयने दिलेल्या आकड्यांमध्ये परदेशी युनिट्सच्या २०० मिलीयन डॉलरचाही समावेश आहे. यात पंजाब नॅशनल बँकेने अदानी उद्योग समूहाला ७ हजार कोटी रुपयांचे कर्ज दिले असून यातील अडीच हजार कोटी रुपये विमानतळ व्यवसायाशी संबंधित आहेत, अशी माहिती देण्यात आली आहे.
परतफेड होत आहे
स्टेट बँक ऑफ इंडियाचे अध्यक्ष दिनेश कुमार खारा यांनी अदानी उद्योग समूहाच्या कर्ज परतफेडीत कुठलीही अडचण नसल्याचे सांगितले आहे. समूहाच्या सर्व कंपन्या नियमीत कर्ज फेडत आहेत. बँकेने दिलेल्या कर्जात आतापर्यंत तरी कुठलीही समस्या उद्भवलेली नाही, असेही ते म्हणाले. रिझर्व्ह बँक ऑफ इंडियाने सर्व बँकांकडून अदानी उद्योग समूहाच्या कर्जांचा सद्यस्थिती अहवाल मागवला आहे.
बँकांवरही प्रश्न
अदानी उद्योग समूहाची मार्केटमधील स्थिती खराब होत असताना त्यांना कर्ज देणाऱ्या बँकांबद्दल उलटसुलट चर्चा सुरू झाल्या. त्यामुळे स्टेट बँक ऑफ इंडियाला ही माहिती द्यावी लागली. अदानी समूहाने हिंडेनबर्गचे सर्व आरोप फेटाळले असले तरीही कर्ज देणाऱ्या बँकांवर प्रश्नचिन्ह नक्कीच उपस्थित झाले आहे.
State Bank of India Adani Group Companies Loan
Finance Banking