सिन्नर (इंडिया दर्पण वृत्तसेवा) – तालुक्यातील गोंदे येथील ३२ वर्षीय ट्रकचालक युवकाचा खून झाल्याची घटना घडली. बुधवारी रात्री आठ वाजेच्या ही घटना उघडकीस आली. संपत रामनाथ तांबे (३२) रा. गोंदे ता. सिन्नर असे खून झालेल्या युवकाचे नाव आहे. पुणे – महामार्गावरील धोंडवीर नगर येथील शिवारात अन्नपूर्णा हॉटेलजवळ युवकाचा मृतदेह आढळून आला. घटनास्थळी मयत युवकाची दुचाकी व छोटीसी तलवार आढळून आल्याची माहिती पोलिसांनी दिली. या तरुणाचा मृतदेह शवविच्छेदनासाठी नाशिकच्या जिल्हा रुग्णालयात पाठविण्यात आला. याप्रकरणी मयत संपत तांबे यांचा भाऊ गणपत रामनाथ तांबे याने सिन्नर पोलीस ठाण्यात अज्ञात आरोपींच्या विरोधात खूनाची फिर्याद दिली. सिन्नर पोलिसांनी अज्ञात आरोपींच्या विरोधात खूनाचा गुन्हा दाखल केला आहे. ही घटना घडल्यानंतर घटनास्थळी पोलीस उपविभागीय अधिकारी अर्जूनराव भोसले, स्थानिक गुन्हे शाखेचे पोलीस निरीक्षक हेमंत पाटील, सिन्नरचे पोलीस निरीक्षक संतोष मुटकुळे यांनी भेट देऊन तपासकामी सूचना केल्या. मयत संपत तांबे याच्या अंगावर धारधार शस्त्राने वार केल्याने घटनास्थळी रक्त सांडलेले दिसून येत होते. घटनास्थळी छोटीसी तलवारही पोलिसांना मिळून आली. पोलीस निरीक्षक संतोष मुटकुळे अधिक तपास करीत आहेत. मयत संपत तांबे याच्या पश्चात आई, भाऊ आणि भाऊजाई असा परिवार आहे.
