मुंबई (इंडिया दर्पण वृत्तसेवा) – राज्यभरातील शाळा आजपासून पुन्हा सुरू होत आहेत. शाळा सुरू करण्यासाठी राज्यभरातून दबाव वाढला होता. संस्थाचालकांनीही जोरदार मागणी केली होती. अखेर राज्याच्या शिक्षण विभागाने यासंदर्भातील प्रस्ताव तयार केला. त्यास मुख्यमंत्र्यांनी मान्यता दिली. त्यानुसार, ज्याठिकाणी कोरोनाचा प्रादुर्भाव कमी आहे तेथे स्थानिक पातळीवर निर्णय घेऊन शाळा सुरू होत आहेत. शाळा सुरु होत असल्यारी कोरोनाच्या नियमांचे पालन करणे बंधनकारक आहे.
राज्यातील पूर्व प्राथमिक ते बारावी पर्यंतच्या सर्व वर्गांच्या शाळा सोमवार दि. 24 जानेवारीपासून सुरू करण्याच्या प्रस्तावास मुख्यमंत्री उद्धव ठाकरे यांनी मान्यता दिली. विद्यार्थ्यांचे आरोग्य आणि सुरक्षितता ही प्राथमिकता लक्षात घेऊन शाळा सुरू करताना कोविड-19 संदर्भात वेळोवेळी जारी करण्यात आलेल्या सर्व मार्गदर्शक सूचनांचे पालन करावे, असे निर्देश शालेय शिक्षण मंत्री प्रा.वर्षा गायकवाड यांनी दिले आहेत.
राज्यात कोविड-19 चा प्रादुर्भाव कमी होत असल्याने शाळा सुरू करण्याबाबत शालेय शिक्षण विभागाने मुख्यमंत्र्यांकडे प्रस्ताव दिला होता. त्यास मुख्यमंत्र्यांनी मान्यता दिली. या अनुषंगाने स्थानिक परिस्थितीचा सातत्याने आढावा घेऊन त्यानुसार निर्णय घेण्याचे अधिकार स्थानिक प्रशासनाला देण्यात आले आहेत. विद्यार्थ्यांना शाळेत पाठविण्यासाठी पालकांची परवानगी आवश्यक राहणार आहे. तथापि कोणाचेही शिक्षण थांबू नये हा प्रयत्न असल्याचे प्रा.गायकवाड यांनी स्पष्ट केले आहे. शाळा सुरू करताना सर्व शिक्षक आणि शिक्षकेतर कर्मचाऱ्यांचे लसीकरण झालेले असणे बंधनकारक आहे. त्याचबरोबर 15 ते 18 वर्षे वयोगटातील विद्यार्थ्यांचे लसीकरण लवकरात लवकर पूर्ण व्हावे, यासाठी प्रशासनाबरोबरच शाळा व्यवस्थापनाने प्रयत्न करावेत, असे निर्देश शालेय शिक्षण मंत्र्यांनी दिले आहेत.
https://twitter.com/MahaDGIPR/status/1484137589007613952?s=20
राज्य टास्क फोर्सचा सल्ला घेऊन मुख्यमंत्र्यांनी शाळा सुरू करण्याचा निर्णय घेतला आहे. टास्क फोर्सच्या काही सदस्यांनी शाळा सुरू करण्यास हरकत नसल्याचे म्हटले. त्यानुसार आता पुन्हा शाळा सुरू होत आहेत. जेथे कोरोनाचा प्रादुर्भाव नाही तेथे शाळा सुरू होणार आहेत. राज्य सरकारने यासंदर्भात स्थानिक पातळीवर अधिकार दिले आहेत. त्यामुळे तहसिलदार आणि जिल्हाधिकारी याबाबत अंतिम निर्णय घेत आहेत. ऑनलाईन आणि ऑफलाईन अशा दोन्ही पद्धतीने शाळा सुरू राहणार असल्याचे गायकवाड यांनी स्पष्ट केले आहे.
