नाशिक (इंडिया दर्पण वृत्तसेवा) – उद्या दिनांक ४ सप्टेंबर पासून महाराष्ट्र क्रिकेट असोसिएशनच्या वतीने घेण्यात येणार्या १६ वर्षांखालील राज्यस्तरीय आमंत्रितांच्या क्रिकेट सुपर लीग (इन्व्हिटेशन सुपर लीग ) स्पर्धा पुणे येथे सुरु होत आहेत. सदर स्पर्धेत डावखुरा सलामीवीर साहिल पारख नाशिक जिल्हा संघाचे नेतृत्व करीत आहे. १६ संघातील ४ गटात ही स्पर्धा होणार आहे. मे व जून २०२२ मध्ये नाशिक येथे सहा संघांच्या झालेल्या आमंत्रितांच्या साखळी (इन्व्हिटेशन लीग), स्पर्धेचे गट विजेतेपद नाशिकने पटकावले होते . पाच साखळी सामन्यांत २ निर्णायक विजय व ३ पहिल्या डावातील आघाडीचे गुण अशी प्रभावी कामगिरी नाशिक जिल्हा संघाने केली होती व त्यामुळेच सुपर लीगच्या फेरीसाठी नाशिकचा संघ पात्र ठरला होता. नाशिकचा समावेश असलेल्या बी गटात पुढील ४ संघ आहेत : आर्यन्स पुणे, अॅमबीशियस पुणे, एमसीए ११ व नाशिक. दोन दिवसीय कसोटी सामन्याच्या स्वरुपात खेळविल्या जाणार्या स्पर्धेतील नाशिकचे सामने ४ , ७ व ११ सप्टेंबर रोजी अनुक्रमे आर्यन्स पुणे, अॅमबीशियस पुणे, एमसीए ११ या संघांबरोबर होणार आहेत.
नाशिक संघ : साहिल पारख (कर्णधार) , लक्ष रामचंदानी ( उपकर्णधार ) , साई राठोड , दिर्घ ब्रम्हेचा, सिद्धार्थ काकड, साहिल बर्वे , सोहम तमखाने , समकीत सुराणा, हुजैफ शेख , वेद सोनवणे, करण कातकाडे, जीशान खान , कृष्णा केदार व किरण फडोळ. राखीव : गर्व रावत, नील चंद्रात्रे, प्रणव येवले व विदुर मौले.
हा संघ सतीश गायकवाड, तरुण गुप्ता व फैय्याज गंजीफ्रॉकवाला यांच्या निवड समितीने निवडला. नाशिक जिल्हा क्रिकेट संघटनेचे चेअरमन विनोद शहा, सचिव समीर रकटे यांनी स्पर्धेतील उत्तम कामगिरीसाठी या संघास शुभेच्छा दिल्या आहेत.