मुंबई (इंडिया दर्पण वृत्तसेवा) – मुंबई महापालिकेच्या अधिकारक्षेत्रात झालेला कोविड सेंटर घोटाळा सध्या चांगलाच गाजत आहे. कोविडचे थैमान थांबून बराच कालावधी उलटला असला तरी मुंबई महापालिकेत झालेला सेंटर घोटाळ्याने आता वादळ आले आहे. या प्रकरणी ईडीने मुंबई महापालिकेवर धाड टाकली असून या अंतर्गत कागदपत्रांची तपासणी करण्यात येणार आहे. दरम्यान, याप्रकरणी ठाकरे गटाचे निटकवर्तीय आणि उबाठा शिवसेनेचे सचिव सूरज चव्हाण यांना सक्तवसुली संचालनालयाने (ईडी) समन्स बजावले आहे.
कोरोना काळात लाइफलाइन हॉस्पिटल मॅनेजमेंट सर्व्हिसेस कंपनीकडून कोविड सेंटर उभारणी आणि वैद्यकीय उपकरण खरेदी कंत्राटामध्ये घोटाळा झाल्याचा आरोप भाजप नेते किरीट सोमय्या यांनी केला आहे. याप्रकरणी मुंबईतील आझाद मैदान पोलिस ठाण्यात लाइफलाइन हॉस्पिटल मॅनेजमेंट सर्व्हिसेस फर्म, भागीदार डॉ. हेमंत रामशरण गुप्ता, सुजित मुकुंद पाटकर, संजय मदनलाल शहा आणि राजू नंदकुमार साळुंखे यांच्याविरोधात गुन्हा दाखल करण्यात आला. हा गुन्हा आर्थिक गुन्हे शाखेकडे वर्ग करण्यात आला आहे.
कोविड सेंटर घोटाळाप्रकरणी ईडीने एसबीआयच्या अधिकाऱ्यांना सोबत घेऊन थेट मुंबई महापालिकेवरच छापा टाकला आहे. बुधवारी ठाकरे गटाच्या सचिवासह पालिकेचे अधिकारी आणि इतरांवर ईडीने छापा टाकला होता. सुमारे १५ ठिकाणी ही छापेमारी झाली होती. या छाप्यांत आढळलेल्या कागपत्रांची शहानिशा करण्यासाठी ईडी पालिकेत पोहोचली आहे. ईडीने आपला मोर्चा महापालिकेच्या खरेदी खाते विभागाकडे वळविला आहे. महत्वाचे म्हणजे ईडीसोबत स्टेट बँकेचे अधिकारी देखील आहेत. कोविड सेंटर घोटाळा प्रकरणी कारवाई आहे. कोविड सेंटरसाठी लागणारी सामग्री खरेदीमध्ये काही गैरव्यवहार झालेत का याची चौकशी केली जात आहे. या खात्याकडूनच सर्व साहित्य कोविड सेंटरना दिले जात होते.
कोण आहे सूरज चव्हाण
सूरज चव्हाण हे ठाकरे गटाच्या शिवसेनेचे सचिव आहेत. ठाकरे यांच्या अनेक निर्णयांमध्ये त्यांचा महत्त्वाचा वाटा असतो. मुंबई महापालिकेने कोविड काळात जे टेंडर काढले त्याच्याशी चव्हाण यांचा संबंध असल्याचा संशय आहे. याचाच एक भाग म्हणून चव्हाण यांच्या निवासस्थानीही ईडीने छापा टाकला. विविध कागदपत्रांची शहानिशा केली आहे. तब्बल १५ तास हे सर्व सुरू होते. आता चव्हाण यांची चौकशी होणार आहे. त्यासाठी त्यांना समन्स बजावण्यात आले आहे. दरम्यान, ईडीने चव्हाण यांच्या निवासस्थानी छापा टाकला आणि चौकशी पूर्ण केल्यानंतर युवासेना प्रमुख आदित्य ठाकरे यांनी चव्हाण यांच्या कुटुंबियांची भेट घेतली. त्यांची आस्थेवाईपणे चौकशी केली तसेच त्यांना धीर दिला.
किरीट सोमय्यांनी केला दावा
कामाला मंजुरीच्या पत्रावर पालिका आयुक्त इक्बालसिंह चहल यांची स्वाक्षरी असल्याचा दावा भाजपा नेते किरीट सोमय्या यांनी केला आहे. त्यांनी वर्क ऑर्डरचे पत्र सोशल मीडियावर टाकले आहे. ईडीने बुधवारी मुंबई, ठाणे आणि नवी मुंबईतील १० ते १५ ठिकाणांवर छापे टाकले. त्यात मुंबई महापालिकेतील तत्कालीन अतिरिक्त आयुक्त संजीव जयस्वाल यांच्यासह माजी मंत्री आणि आमदार आदित्य ठाकरे यांचे निकटवर्तीय व शिवसेना सचिव सूरज चव्हाण, सुजीत पाटकर यांच्या घर आणि कार्यालयांची तपासणी करण्यात आली.
