पिंपळगाव बसवंत: जिल्हातील कांदा उलढालीचे माहेरघर असलेल्या पिंपळगाव बसवंत नगरीत माथाडी कामगार टोळी दोनच्या कामगारांनी मंगळवार पासून काम बंदचा पवित्रा घेतल्याने पिंपळगाव बाजार समितीत १० नोव्हेंबर रोजी होणारे कांदा लिलाव पिंपळगाव कांदा असोसिएशनच्या वतीने पूर्णतः बंद ठेवल्याने पिंपळगाव बाजारसमितीची दिवसाकाठी जवळपास ६ कोटींची उलाढाल ठप्प होती.
माथाडी कामगार टोळी दोनच्या जवळपास ३५० कामगारांनी व्यापारी वर्गास कुठलीही पूर्व कल्पना न देता मंगळवार दुपारपासून वाढीव मजुरीसह वाढीव वाराही मिळावी या प्रमुख मागण्यासाठी काम बंद आंदोलन पुकारल्याने पिंपळगाव बाजार समितीतील मंगळवारी पार पडलेल्या कांदा लिलावावर याचा परिणाम दिसून आला. तर माथाडी कामगार संपामुळे पिंपळगाव बसवंत व्यापारी असोसिएशनच्या वतीने संपावर तोडगा निघेपर्यंत १० नोव्हेंबरपासून कांदा लिलाव बंद ठेवण्याचा निर्णय घेतल्याने पहिल्याच दिवशी पिंपळगाव बाजार समितीतील कांद्याची ६ कोटीची उलाढाल ठप्प झाली.
