इंडिया दर्पण ऑनलाईन डेस्क – एका महिलेने बलात्कार झाल्याचा आरोप केला. पोलिसांनी त्याला पकडले आणि न्यायालयात हजर केले. पण बलात्कार झाल्याचे तिला सिद्ध करता आले नाही आणि त्यासंदर्भात न्यायालयाने नोंदविलेले निरीक्षण सध्या चर्चेचा विषय ठरत आहे.
भूवनेश्वर येथील एका विवाहित महिलेने तिच्याच दिराविरुद्ध बलात्काराची तक्रार पोलिसांत दिली. प्रकरण न्यायालयात गेल्यानंतर महिलेला बलात्कार झाल्याचे सिद्ध करता आले नाही. दिराने बळजबरी केली आणि बलात्कार केला, असा आरोप महिलेने केला. न्यायालयाने बळजबरी झाल्याच्या मुद्यावरून काही निरीक्षणे नोंदवली. बलात्कार झाला असता तर महिलेच्या शरीरावर जखमा दिसल्या असल्या. परंतु, वैद्यकीय तपासात काहीही आढळलेले नाही. आरोप करणारी महिला प्रौढ असून तिला लैंगिक संबंधांविषयी सारे काही कळत होते. तिला लैंगिक संबंधांचा अनुभव असल्याचेही स्पष्ट आहे. तिने आरोपीला कोणत्याही प्रकारचा विरोध केला नाही. तिने लैंगिक संबंधांवर आक्षेपही घेतला नाही, असे निरीक्षण न्यायालयाने नोंदविले. महिलेने स्वतःचा जीव वाचविण्यासाठी घटनेत फेरफार केला आणि आपल्यावर बलात्कार झाल्याचे भासवले, असेही न्यायालय म्हणाले. त्यानंतर आरोपीची निर्दोष मुक्तताही करण्यात आली. पोलिसांचा तपास पूर्ण झाल्यानंतर सत्र न्यायालयाने आरोपीला बलात्कारासाठी जबाबदार ठरविले. त्यानंतर आरोपीने उच्च न्यायालयात धाव घेतली. तिथे त्याची निर्दोष मुक्तता करण्यात आली.
पतीला बघताच…
संबंधित महिला एका रात्री जंगलातून परत येत असताना आरोपीने तिच्यावर बलात्कार केला, अशी तक्रार नोंदविण्यात आली होती. २०१४ मधील ही घटना आहे. रात्री उशीर झाला तरी बायको घरी आली नाही म्हणून पतीने शोध सुरू केला. त्यावेळी सख्ख्या भावासोबत आपली बायको नको त्या स्थितीत असल्याचे त्याला दिसले. पतीला बघताच तिने दिराला लाथ मारली आणि तिथून पळून गेली.
odisha high court women rape accused acquitted
legal
