नाशिक : गोव्यात विक्रीस उपलब्ध असलेल्या व अन्य ठिकाणी बंदी असलेल्या गोव्याच्या दारूची नाशिकमधून बेकायदा वाहतुक होत असल्याचा प्रकार समोर आला आहे. राज्य उत्पादन शुल्क विभागाने केलेल्या कारवाईत हा प्रकार उघडकीस आला असून पथकाने कोल्हापूर येथील दोघांना बेड्या ठोकत पिकअपसह दारूसाठा असा सुमारे दहा लाखाचा मुद्देमाल हस्तगत केला आहे. ही कारवाई एक्साईजच्या भरारी पथक क्र.१ ने केली. अतुल तानाजी कांबळे (३२ रा.गडमुडशिंगी ता.करवीर) व सचिन सदाशिव कांबळे (१९ रा.गांधीनगर ता.करवीर) अशी अटक केलेल्या कोल्हापूर जिह्यातील दोघा संशयीतांची नावे आहेत. गोवा निर्मीत आणि त्याच ठिकाणी विक्रीस उपलब्ध असलेल्या व अन्य ठिकाणी बंदी असलेल्या विदेशी दारूची नाशिक शहरातून बेकायदा वाहतुक होणार असल्याची माहिती भरारी पथकाचे दुय्यम निरीक्षक यशपाल पाटील यांना मिळाली होती. त्यानुसार मंगळवारी (दि.१६) मध्यरात्री महामार्गावरील पाथर्डी फाटा भागात सापळा लावण्यात आला होता. शिवाजी पुतळयासमोर पथकाने भरधाव आलेली पिकअप (एमएच ०९ सीए ५२७६ ) अडवून तपासणी केली असता मद्यसाठा एक्साईज विभागाच्या हाती लागला. पिकअप वाहनात बॉम्बे,गोल्डन ऐस आणि गोल्डन ब्लॅक नावाच्या विदेशी मद्याची १०५ बॉक्स आढळूण आले. हा मद्यसाठा गोवा राज्यात विक्रीस उपलब्ध असून अन्य ठिकाणी त्यास विक्रीस बंदी आहे. पथकाने दोघा संशयीतांना बेड्या ठोकत वाहनासह मद्यसाठा असा सुमारे १० लाख ४ हजार ४०० रूपये किमतीचा मुद्देमाल हस्तगत केला आहे. ही कारवाई निरीक्षक जयराम जाखेरे,दुय्यम निरीक्षक अरूण सुत्रावे जवान सुनिल दिघोळे,धनराज पवार,एम.पी.भोये,राहूल पवार व अनिता भांड आदींच्या पथकाने केले. अधिक तपास दुय्यम निरीक्षक यशपाल पाटील करीत आहेत.
