नाशिक (इंडिया दर्पण वृत्तसेवा) – मागील भांडणाची कुरापत काढून म्हसरूळ परिसरात तरुणावर प्राणघातक हल्ला करण्यात आला आहे. या घटनेत तरूणावर धारदार शस्त्राने वार करण्यात आले असून तो गंभीर जखमी आहे. जखमी तरुणाचे नाव गौरव थोरात आहे. गौरवला जिल्हा शासकीय रुग्णालयात दाखल करण्यात आले असून त्याच्यावर उपचार सुरु आहेत.
रात्रीच्या वेळी घडलेल्या या हल्ल्याने नागरिकांमध्ये भीतीचे वातावरण निर्माण झाले आहे. या हल्यानंतर परिसरात तणावाचे वातावरण निर्माण असून संतापही व्यक्त केला जात आहे. म्हसरूळच्या चाणक्यपुरीतील ही घटना आहे. या घटनेच्या माहिती मिळताच पोलीस घटनास्थळी दाखल झाले आहेत. त्यानंतर घटनेतील संशयित हल्लेखोरांचा शोध पोलिसांनी सुरू केला आहे. नाशिकमध्ये गु्न्हेगारीचे प्रमाण वाढले आहे. रोज खून, हल्लासह चो-यांचे प्रमाणही वाढले आहे. शनिवारी गुन्हेगारीचा आढावा घेतांना पालकमंत्री दादा भुसे यांनी १५ दिवसांचे पोलिसांना अल्टीमेटम दिले होते. पण, दुसऱ्याच दिवशी ही घटना घडली.
मालेगावात शस्त्रास्त्रांसह तरुणाला अटक
शहरातील पवारवाडी पोलिस स्टेशनच्या हद्दीतील गुलशेर नगर मध्ये मोहम्मद अमीन नामक या तरुणांच्या घरी पोलिस इपअधिक्षक तेगबिर सिंह संधू यांच्या पथकाने छापा टाकत तलवार, चॉपर,कोयता अशी हत्यारे जप्त करुन तरुणाला ताब्यात घेतले. या तरुणाचा व्हिडीओ सोशल मीडियावर व्हायरल झाल्या नंतर पोलिसांनी ही कारवाई केली. ही हत्यारे त्याने कोठून व कशासाठी आणले याचा पोलिस तपास करीत आहे. मालेगाव शहरात गुन्हेगारीचे प्रमाण वाढले असून त्यात हत्यारे बाळगणा-या तरुणाला अटक झाल्यामुळे पोलिसांनी याचा कसून शोध सुरु केला आहे.
मालेगाव शहर हे संवेदनशील आहे. त्यामुळे या तलवारी, चॅापर व कोयता कशासाठी आणल्या हा प्रश्न आहे. जानेवारी महिन्यात याच भागात अजमेर येथून आलेल्या धारदार तलवारी, कुकरी, गुप्त्या असा शस्त्र साठा जप्त केला होता. अजमेर येथून हा शस्त्र साठा येणार असल्याची गुप्त माहिती मिळताच पवारवाडी पोलिसांनी म्हाळदे शिवारातील ब्रीज जवळ सापळा रचत परवेज आलम जमालुद्दीन या १९ वर्षीय तरुणाला ताब्यात घेतले होते. त्यानंतर त्याच्या जवळील ८ तलवारी,५ कुकरी, ८ गुप्त्या, १० रॅम्बो चाकू अशी वेगवेगळी हत्यार जप्त करण्यात आली होती. आता याच भागात तलवार, चॉपर,कोयता अशी हत्यारे जप्त करण्यात आली आहे.
nashik malegaon city crime youth arrest attack police rural
