आजपासून केवळ ३ दिवस उघडे राहणार हे मंदिर…. वर्षभर राहते बंद… हे आहे कारण

आजपासून नाशिकच्या पंचवटीतील शनिचौकात असलेल्या कार्तिक स्वामी मंदिरात कार्तिक स्वामी महोत्सवास सुरूवात होणार आहे.
गेल्या आठ दहा वर्षांपासून कार्तिक पौर्णिमेला कार्तिक स्वामींचे दर्शन घेण्याचे प्रमाण खूपच वाढले आहे. मधल्या दोन वर्षांत इतर मंदिरांप्रमाणे येथेही दर्शन बंद होते. परंतु यंदा सगळे निर्बंध उठल्याने कार्तिक स्वामी मंदिरात लोकं दर्शनासाठी गर्दी करतील अशी खात्री आहे.

कार्तिक पौर्णिमेला मुख्यत्वे करून कार्तिकेयाचे पूजन केले जाते. कार्तिकेयांना दक्षिण दिशेचे स्वामी मानले जाते. कार्तिक स्वामींचं दर्शन महिलांनी घेऊ नये, तसेच हे मंदिर वर्षभर बंद असते फक्त कार्तिक पौर्णिमेलाच उघडते असे या मंदिराविषयी प्रवाद ऐकू येत असत. पण ते काही खरं नाही. कार्तिक स्वामींची सर्व मंदिरं वर्षभर उघडी असतात आणि स्त्रिया व पुरूष असा काही भेदभाव तिथे केला जात नाही. उलट दक्षिणेकडे कार्तिक स्वामींचे दर्शन घेण्यासाठी पुरूषां पेक्षा स्त्रियांचीच संख्या सर्वाधिक असते.

कालच पंचवटीतील शनि चौकातील कार्तिक स्वामी मंदिरात जावून आलो. कार्तिक स्वामींच्या नाशिकमधील जुन्या मंदिरांत या मंदिराचा समावेश होतो.
असंख्य भाविकांचे श्रद्धास्थान असलेल्या पंचवटीतील कार्तिक स्वामी मंदिराचे जिर्णोद्धाराचे काम दोन महिन्यांपूर्वीच पुर्ण झाले आहे. मंदिराला रंगरंगोटी करण्यात आली आहे. गाभारा सुशोभित करण्यात आला आहे. मंदिरावर आकर्षक लायटींग करण्यात आली आहे. एकंदरीत मंदिर प्रसन्न वाटतेय .

श्री काशी नाट्टकोटाई नगर छत्रम मॅनेजिंग सोसायटीतर्फे या मंदिराचे व्यवस्थापन केले जाते. गेली दोन वर्षे करोना निर्बंधामुळे हा महोत्सव साध्या पध्दतीने केला होता.यंदा मोठ्याप्रमाणात उत्सव साजरा करण्यासाठी मंदिर सज्ज झाले आहे.
कार्तिक पौर्णिमेनंतर दरवर्षी तीन दिवस कार्तिक स्वामी महोत्सव साजरा केला जातो. या काळांत कार्तिक स्वामींचे दर्शन घेतले तर आर्थिक सुबत्ता वाढते. आरोग्य सुधारते. अडचणी दूर होतात अशी श्रद्धा असल्याने दर्शनेच्छुंची गर्दी दिवसेंदिवस वाढतेच आहे. कार्तिक स्वामींच्या मंदिरासमोर भाविकांच्या रांगाच रांगा लागलेल्या दिसतात.

संपूर्ण कार्तिक महिन्याला देवांनी अनन्यसाधारण महत्त्व दिले आहे. कार्तिक महिन्यात भगवान कार्तिक स्वामींना अधिक महत्त्व प्राप्त झाले आहे. भगवान शंकर-पार्वतीचा ज्येष्ठ पुत्र आणि श्री मंगलमूर्ती गजाननाचा ज्येष्ठ बंधूचा मान लाभलेल्या कार्तिक स्वामींचे स्वतःचे वैभव वेगळे आहे. षडानन, मुरूगन, महादेवपुत्र, कार्तिकेय अशा विविध नावांनी या देवतेची ओळख आहे. दक्षिण भारतात कार्तिक स्वामींची अनेक मंदिरे आहेत. आता महाराष्ट्रात देखील गावोगावी कार्तिक स्वामींची असंख्य मंदिरं तयार झाली आहेत.

यावर्षी सोमवार दिनांक ७ नोव्हेंबर सायंकाळी ४ वाजून १७ मिनिटांनी कार्तिक पौर्णिमा सुरू होणार आहे. मंगळवार दिनांक ८ नोव्हेंबर रोजी सायंकाळी ४ वाजून ३२ मिनिटांपर्यंत पौर्णिमा असल्यामुळे या काळांत भाविकांना कार्तिक स्वामींचे दर्शन घेता येईल. तसेच रात्री १ वाजून ३९ मिनिटांनी कृतिका नक्षत्र सुरू होईल ते बुधवार दिनांक ९नोव्हेंबर रोजी रात्री ३ वाजून मिनिटांपर्यंत असेल. या मुहूर्तावर देखील भाविकांना दर्शन घेता येईल.

यंदा भाविकांची गर्दी होईल या अंदाजाने मंदिरात प्रवेशांसाठी आणि बाहेर जाण्यासाठी बॅरिकेडस लावून स्वतंत्र मार्ग तयार करण्यात आले आहेत. मंदिराबाहेर प्रसाद आणि मोराच्या पिसांची दुकाने सजली आहेत. पंचवटीतील शनि चौकातील कार्तिक स्वामी मंदिरा प्रमाणेच द्वारके जवळील ‘आयप्पा नवग्रह मंदिर’, सातपूर येथील कार्तिक स्वामी मंदिर तसेच विहितगाव येथील ‘आण्णा गणपती नवग्रह मंदिरात ‘ देखील कार्तिक स्वामींचे दर्शन घेण्यासाठी हजारो भाविक गर्दी करतात.

Nashik Kartik Swami Temple open for only 3 Days
Kartik Pournima