मुंबई (इंडिया दर्पण वृत्तसेवा) – विधानपरिषदेच्या निवडणुकीत नाशिकमध्ये वेगळेच रंग बघायला मिळत आहेत. आजपर्यंत कधीही झाली नाही अशी नाशिक पदवीधर मतदारसंघाची निवडणुक होऊ घातली आहे. भाजपने उमेदवारच दिला नाही. काँग्रेसचे उमेदवार डॉ. सुधीर तांबे यांनी अर्जच भरला नाही. त्यांचे पुत्र सत्यजित यांनी अपक्ष अर्ज भरला. हे नाट्य घडल्यानंतर आता आणखी घडामोडी घडत आहेत. धुळ्याच्या शुभांगी पाटील यांनी मातोश्री गाठत ठाकरे गटासह महाविकास आघाडीचा पाठिंबा मिळविला आहे. तर, धनराज विसपुते हे भाजप नेते व उपमुख्यमंत्री देवेंद्र फडणवीस यांच्या भेटीला गेले आहेत. त्यामुळे सत्यजित तांबे यांच्या अडचणी वाढू शकतात.
या निवडणुकीत २२ अपक्ष रिंगणात असून मोठ्या राजकीय पक्षांमधून बंडखोरी करून अर्ज दाखल करणाऱ्यांमध्ये खरी चुरस असणार आहे. काँग्रेसच्या उमेदवाराने अर्ज न भरता आपल्या मुलाला अपक्ष उभे केले असतानाच भाजपने तिकीट नाकारलेल्या उमेदवाराने आता अपक्ष अर्ज दाखल केला आहे. भाजपच्या शुभांगी पाटील यांना पक्षाने उमेदवारीचे आश्वासन दिले होते. त्यानुसार त्यांनी तयारी केली होती. शुभांगी पाटील यांनी गेल्यावर्षी सप्टेंबरमध्ये भाजपमध्ये प्रवेश केला होता. त्यानंतर त्यांनी पदवीधरसाठी तयारी सुरू केली. त्यांच्यासाठी डॉक्टर्स, पदवीधर, शिक्षकांनी घरोघरी जाऊ सभासद करून घेतले, असा दावा त्यांनी स्वतःच केला आहे.
भाजपनेही आपल्या मेहनतीची दखल घेतली होती. पण आपलाच पक्ष सोबत नसल्याचे लक्षात आल्याने अपक्ष निवडणूक लढण्याचा निर्णय घेतला. आता ही निवडणूक आपण लढविणारच आहे, असा निर्धार शुभांगी पाटील यांनी व्यक्त केला आहे. शुभांगी पाटील या महाराष्ट्र राज्य टीचर्स असोसिएशनच्या अध्यक्ष आहेत. नाशिक विभाग पदवीधर मतदार संघात नाशिकसह धुळे, जळगाव, नंदूरबार आणि अहमदनगर या जिल्ह्यांचा समावेश होतो. यात जवळपास ५४ तालुक्यांचा समावेश होतो. या एकूणच मतदारसंघात त्या एकमेव महिला उमेदवार आहेत. विशेष म्हणजे भाजपने स्वतःचा उमेदवार जाहीर न करण्याचं काय कारण असावं, याचीही चर्चा सुरू झाली आहे.
शुभांगी पाटील यांच्याविषयी
शुभांगी पाटील या धुळ्यातील भास्कराचार्य संशोधन संस्थेमध्ये शिक्षिका आहेत. त्यांचे शिक्षण बीए, डीएड, एमए, बीएड, एललबी असे झाले आहे. महाराष्ट्र टिचर्स असोसिएशनच्या त्या राज्य अध्यक्ष आणि संस्थापिका आहेत. त्याशिवाय महाराष्ट्र स्टुडंट असोसिएशनच्या त्या संस्थापक अध्यक्षही आहेत. त्याचबरोबर महाराष्ट्र नर्सिंग अँड पॅरामेडिकल एम्प्लॉईज असोसिएशनच्या त्या प्रमुख सल्लागार, नंदूरबारच्या मोलगी येथील ग्रामविकास मंडळाच्या सचिव, जळगावच्या गोपाल बहुउद्देशीय संस्था आणि धुळ्याच्या युनिव्हर्सल एज्युकेशन सोसायटीच्याही त्या अध्यक्ष आहेत.
भाजप कुणासोबत?
भाजपच्या शुभांगी पाटील यांनी अपक्ष निवडणुक लढविण्याचा निर्णय घेतल्यानंतर भाजपच्या भूमिकेबद्दल संशय व्यक्त होत आहे. भाजप काँग्रेसच्या उमेदवारासोबत असल्याचा आरोप शुभांगी पाटील यांनी अप्रत्यपणे केला आहे.
मातोश्रीचा पाठिंबा
शुभांगी पाटील यांनी अपक्ष उमेदवारी दाखल केल्यानंतर आश्रयासाठी थेट मातोश्री गाठली. ठाकरे गटाने आपल्याला पाठिंबा द्यावा, अशी अपेक्षा त्यांनी व्यक्त केली. विशेष म्हणजे संजय राऊत यांनी ही निवडणुक बिनविरोध होऊ देणार नाही, असा निर्धारच व्यक्त केला आहे. उद्धव ठाकरे यांच्या भेटीत त्यांनी पाटील यांना पाठिंबा दर्शविला आहे. तर, काँग्रेसच्या उमेदवाराने येथे अर्ज दाखल केलेला नाही. त्यामुळे महाविकास आघाडीने आता नाशिकची जागा शिवसेनेच्या ठाकरे गटाला देऊ केली आहे. म्हणजेच आता शुभांगी यांना महाविकास आघाडीचा पाठिंबा असणार आहे. त्यामुळे आता सत्यजित तांबे आणि शुभांगी पाटील यांच्यात लढत होणार आहे.
Nashik Graduate Constituency Election Politics Happening