नाशिक (इंडिया दर्पण वृत्तसेवा)- बहुचर्चित महापालिकेच्या सीटीलिंक बससेवा पुन्हा एकदा चर्चेत आली आहे. या सेवेत कंत्राटदाराकडून पैसे घेवून नोकरी दिल्याचे वास्तव समोर आले असून, अधिका-यांकडून कामगारांची पिळवणुक होत आहे. सुट्टी मागणा-या कामगारास जातीवाचक शिवीगाळ करण्यात आल्याचा धक्कादायक प्रकार पुढे आल्याने याप्रकरणी मुंबईनाका पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार मनोहर भोये, राजेश वाघ व सुरेश भदाणे अशी गुन्हा दाखल करण्यात आलेल्या संशयितांची नावे आहेत याबाबत लाईन चेकर सुनिल कोल्हे (रा.बोरगड) यांनी फिर्याद दिली आहे. सन. २०२२ मध्ये कोल्हे यांना मनपाच्या सिटीलिंक सेवेत लाईन चेकिंग या पदावर समाविष्ट करण्यासाठी ४ लाख ५ हजाराची रोकड स्विकारण्यात आल्याचा दावा करण्यात आला आहे. असाच प्रकार आठ कर्मचा-यांसमेवत झाला असून, संबधीतांच्या वेतनातून डिसेंबर २०२३ पर्यंत १ लाख ३४ हजार ३०० रूपयांची रक्कम परस्पर खंडणी स्वरूपात काढून घेण्यात आल्याचा आरोप करण्यात आला आहे.
तरण तलाव येथील कार्यालयात कार्यरत संशयित सुरेश भदाणे याने रजा मंजूरीच्या कारणातून जातीवाचक शिवीगाळ केल्याचा आरोप फिर्यादीत करण्यात आला आहे. अधिक तपास उपनिरीक्षक गोडे करीत आहेत.
