नाशिक (इंडिया दर्पण वृत्तसेवा) – त्र्यंबकरोडवरील पपया नर्सरी भागात भरधाव दुचाकीस कुत्रा आडवा गेल्याने झालेल्या अपघातात २१ वर्षीय तरूण ठार झाला. गणेश रघूनाथ बागुल (२१ रा. लखानी ता. कळवण) असे मृत दुचाकीस्वाराचे नाव आहे. याप्रकरणी सातपूर पोलिस ठाण्यात मृत्यूची नोंद करण्यात आली आहे.
बागुल गुरूवारी (दि.११) सकाळच्या सुमारास आपल्या दुचाकीने पपया नर्सरी कडून सातपूर कॉलनीच्या दिशेने प्रवास करीत असतांना हा अपघात झाला. भरधाव दुचाकीस कुत्रा आडवा आल्याने तो पडला होता. या घटनेत गंभीर दुखापत झाल्याने मित्र शरद गायकवाड यांनी त्यास तात्काळ जिल्हा रूग्णालयात दाखल केले असता उपचार सुरू असतांना वैद्यकीय सुत्रांनी मृत घोषीत केले. अधिक तपास हवालदार आहेर करीत आहेत.
कॅनडा कॉर्नरवर सलूनमध्ये महिलेला मारहाण
कॅनडा कॉर्नर भागात सलूनमध्ये काम करणाऱ्या महिलेस एकाने मारहाण केल्याची घटना घडली आहे. अश्लिल हाव भाव करीत संशयिताने पीडितेचा मोबाईल फोडून टाकल्याने तिने पोलीसात धाव घेतली. याप्रकरणी सरकारवाडा पोलिस ठाण्यात नोंद करण्यात आली आहे.
पोलिसांनी दिलेल्या माहितीनुसार निरंजन किशोर शिंदे (२५ रा.नाशिक) असे संशयिताचे नाव आहे. याप्रकरणी हनुमानवाडीत राहणा-या ३५ वर्षीय पीडितेने तक्रार दाखल केली आहे. पीडिता व संशयित विसेमळा भागातील एका सलूनमध्ये कामास असून बुधवारी (दि.१०) सायंकाळच्या सुमारास दोघांमध्ये किरकोळ वाद झाला.
यावेळी संशयिताने अश्लिल हाव भाव करीत पीडितेस मारहाण केली. या झटापटीत पीडितेचा मोबाईल फोन फोडून संशयिताने नुकसान केल्याने तिने पोलिसात धाव घेतली असून अधिक तपास हवालदार माळोदे करीत आहेत.
