नाशिक (इंडिया दर्पण वृत्तसेवा) – सवलतीच्या दरात विदेशातील सहलीचे नियोजन करण्यात आल्याची बतावणी करत एकाने ८० हजाराची फसवणूक केल्याचे समोर आले आहे. थायलंड हॉलीडे पॅकेजचे आमिष दाखवित भामट्याने हा गंडा घातला आहे. सवलती ही रक्कम ऑनलाईन बँक खात्यात भरल्यानंतर मुदतीत पॅकेजचे तिकीट प्राप्त न झाल्याने ग्राहकाने पोलिसात धाव घेतली आहे. याप्रकरणी मुंबईनाका पोलिस ठाण्यात फसवणुकीसह आयटीअॅक्ट नुसार गुन्हा दाखल करण्यात आला आहे.
रोहित शर्मा असे संशयित ठकबाजाचे नाव आहे. सुशिल राजाराम सोनवणे (५७ रा.गोविंदनगर) यांनी याप्रकरणी तक्रार दाखल केली आहे. संशयिताच्या वतीने सवलतीच्या दरात विदेशातील सहल अशी जाहिरात करण्यात आल्याने सोनवणे यांनी त्याच्याशी संपर्क केला असता ही घटना घडली. सोनवणे यांना उन्हाळी सुट्टीनिमित्त विदेशात जायचे असल्याने त्यांनी संबंधिताशी संपर्क साधला असता थायलंड टूर निश्चित करण्यात आला होता. संशयिताने थायलंड हॉलिडे पॅकेजचे स्वस्तातील आमिष दाखविल्याने ८० हजाराचा खर्च ठरला होता.
त्यानुसार १ जानेवारी ते २३ जानेवारी दरम्यान सोनवणे यांना संबधीताने स्वतःच्या फेडरल बँक खात्यात ऑनलाईन पैसे भरण्यास भाग पाडले. चार महिने उलटूनही संबधीताने पॅकेजचे तिकीट न पाठविल्याने तसेच संपर्क तोडल्याने सोनवणे यांनी पोलिसात धाव घेतली असून अधिक तपास उपनिरीक्षक शेळके करीत आहेत.