नाशिक (इंडिया दर्पण वृत्तसेवा) – शहराच्या वेगवेगळ्या भागातून नुकत्याच दोन दुचाकी चोरट्यांनी पळवून नेल्या. याप्रकरणी पंचवटी आणि अंबड पोलिस ठाण्यात गुन्हे दाखल करण्यात आले आहेत.
पहिली घटना अंबड लिंकरोडवरील चुंचाळे शिवारात घडली. दिलीपसिंग शिवशंकर सिंग (रा.घरकुल योजना चुंचाळे) यांची शाईन मोटारसायकल एमएच १५ जीजी ६८०१ बुधवारी (दि.१०) रात्री त्यांच्या घरासमोर पार्क केलेली असतांना ती चोरट्यांनी पळवून नेली. याप्रकरणी अंबड पोलिस ठाण्यात गुन्हा दाखल करण्यात आला असून अधिक तपास पोलिस नाईक सावळे करीत आहेत.
दुसरी घटना पंचवटी भाजी मार्केट येथे घडली. तारवालानगर भागात राहणारे नरेश ईश्वर गायकवाड (रा.सप्तशृंगी नगर) हे गेल्या सोमवारी (दि.८) पंचवटी भाजी मार्केट यार्ड भागात गेले होते. हॉटेल साई प्रसाद समोर त्यांनी आपली स्प्लेंडर एमएच १५ एव्ही ७८६० पार्क केली असता ती चोरट्यांनी चोरून नेली. याप्रकरणी पंचवटी पोलिस ठाण्यात गुन्हा दाखल करण्यात आला असून अधिक तपास पोलिस नाईक शिंदे करीत आहेत.
दोन्ही हातांवर ब्लेडने वार करीत गळफास घेऊन आत्महत्या
जेलरोड परिसरातील लोखंडे मळा भागात दोन्ही हातांवर ब्लेडने वार करीत एकाने गळफास लावून घेत आत्महत्या केल्याची घटना घडली. अजय मधूकर नागरे (५४ रा.रघूनंदन हौ.सोसा.सप्तशृंगीनगर) असे मृत व्यक्तीचे नाव आहे. नागरे यांच्या आत्महत्येचे कारण समजू शकले नाही. याप्रकरणी उपनगर पोलिस ठाण्यात मृत्यूची नोंद करण्यात आली आहे.
पोलिसांनी दिलेल्या माहितीनुसार नागरे यांनी गुरूवारी (दि.११) दुपारी अज्ञात कारणातून आपल्या राहत्या घरात दोन्ही हातावर ब्लेडने वार करून घेतला होता. त्यापाठोपाठ पंख्यास ओढणी बांधून गळाफास लावून घेतला ही बाब निदर्शनास येताच कुटूंबियांनी त्यांना तात्काळ जिल्हा रूग्णालयात दाखल केले असता वैद्यकीय सुत्रांनी मृत घोषीत केले.
