नाशिक (इंडिया दर्पण वृत्तसेवा) – वेगवेगळय़ा भागात बेकायदा मद्यविक्री करणा-या दोघा मद्यविक्रेत्यांवर कारवाई करुन साडे पाच हजार रूपये किमतीचा देशी विदेशी दारूचा साठा पोलिसांनी हस्तगत केला आहे. याप्रकरणी उपनगर आणि अंबड पोलिस ठाण्यात गुन्हे दाखल करण्यात आले आहेत. पहिली कारवाई अंबड लिंकरोडवरील संजीवनगर येथील म्हाडा कॉर्नर भागात करण्यात आली. विशाल राजेंद्र पाटील (३१ रा.गौरव निवास,स्वामी समर्थ केंद्राजवळ,श्रमिकनगर) हा युवक इंडियन ऑईल पेट्रोल पंपासमोर मद्यविक्री करतांना मिळून आला. संशयिताच्या ताब्यातील पांढ-या गोणीमध्ये प्रिन्स संत्रा नावाचा ९८० रूपये किमतीचा देशी दारूचा साठा मिळून आला. याप्रकरणी पोलिस शिपाई मुकेश गांगुर्डे यांनी दिलेल्या तक्रारीवरून अंबड पोलिस ठाण्यात गुन्हा दाखल करण्यात आला असून अधिक तपास हवालदार पानसरे करीत आहेत.
दुसरी कारवाई वडनेरगेट भागात करण्यात आली. येथे एक दुचाकीस्वार बेकायदा मद्यविक्री करीत असल्याची माहिती शहर गुन्हे शाखेच्या युनिट २ च्या पथकास मिळाली होती. त्यानुसार शुक्रवारी सायंकाळच्या सुमारास पथकाने सापळा लावला असता सोमनाथ बजरंग अभंग (४३ रा.वडनेर दुमाला) हा संशयित शिवाजी पुतळय़ा जवळ पोरजे वस्तीकडे जाणा-या मार्गावर एमएच १५ एफबी ३६१५ या मोपेडवर मद्यविक्री करतांना मिळून आला. संशयिताच्या दुचाकीच्या डिक्कीतील पिशवीत सुमारे ४ हजार ४२० रूपये किमतीचा विदेशी मद्याचा साठा मिळून आला असून याप्रकरणी युनिट २ चे कर्मचारी गुलाब सोनार यांनी दिलेल्या तक्रारीवरून उपनगर पोलिस ठाण्यात संशयिताविरोधात दारू बंदी कायद्यान्वये गुन्हा दाखल करण्यात आला आहे. अधिक तपास जमादार सातभाई करीत आहेत.
