नाशिक (इंडिया दर्पण वृत्तसेवा) – नाशिक ग्रामीण पोलिस दलात आंतरजिल्हा बदलीसाठी खोटे प्रमाणपत्र देणा-या खासगी डॅाक्टराला पोलिसांनी नंदूरबार जिह्यातील खापर येथून अक्कलकुवा तालुका पोलिसांनी ताब्यात घेतले. त्यानंतर या डॅाक्टरला ग्रामिण पोलिसांनी बेड्या ठोकल्या आहेत. हा डॅाक्टर आपल्या एका नातेवाईकाबरोबर होता. आता पोलिस पथक दोघांना घेवून नाशिकच्या दिशेने निघाले आहे. डॉ. स्वप्निल सैंदाणे असे अटक करण्यात आलेल्या संशयित खासगी डॉक्टरचे नाव आहे.
नाशिक ग्रामीण पोलिस दलात आंतरजिल्हा बदल्यांमध्ये खोटे प्रमाणपत्र वापरल्याचा प्रकार समोर आल्यानंतर पोलिसांनी कसून तपास सुरु केला आहे. या प्रकरणात सोळा पोलिस अर्जदारांनी सादर केलेले अहवाल सदोष असल्याचे उघड झाले. त्यानंतर गुन्हा दाखल झाला होता. या प्रकरणाचा पोलिस तपास घेत असतांना प्रभावती (यापूवीर्चे स्पंदन), साईछत्र, गणेश मल्टिस्पेशालिस्ट या रुग्णालयांच्या नावाने बनावट अहवाल सादर करण्यात आल्याचा प्रकार समोर आला. यापैकी साईछत्र हे रुग्णालय कोरोना काळापुरतेच सुरू राहिल्याची माहिती सूत्रांनी दिली. हे सर्व अहवाल डॉ. स्वप्नील सैंदाणे याने दिल्याचे पोलिस तपासात उघड झाले. त्यामुळे त्याला पोलिसांनी अटक केली आहे. बीएएमएस ही पदवी असतांना संशयिताने एमडी डॉक्टर असल्याचे भासवून हा उद्योग केल्याचे सूत्रांनी सांगितले.
असा घेतला शोध
नाशिक तालुका पोलिस ठाण्याची पथके डॉ. स्वप्नील याचा शोध घेत होते. मात्र, त्याचा फोन नॉट रिचेबल असल्याने लोकेशन मिळत नव्हते. पण, दोन दिवसांपूर्वी धुळ्यात असल्याचे समजले. मात्र, त्याने तिथून पळ काढला. यानंतर पथकांनी गुप्त माहितीच्या आधारे त्याचा माग काढला. मंगळवारी सायंकाळी डॉ. स्वप्नील याला नंदूरबार जिह्यातील खापर ता.अक्कलकुवा येथे तालुका पोलिसांनी ताब्यात घेतले. या कारवाईत त्याच्या एका नातेवाईकासही बेड्या ठोकण्यात आल्या असून बुधवारी (दि.२८) दोघांना नाशिक जिल्हा व सत्र न्यायालयात सादर करण्यात येणार आहे. संशयितांच्या चौकशीत या प्रकरणाचा भांडाफोड होण्याची शक्यता असून खासगी रुग्णालयातील संशयित व अहवाल तयार करणा-यांची माहिती पुढे येईल असा विश्वास पोलिस सूत्रांनी व्यक्त केला आहे.
