नाशिक : चांडक सर्कल भागात पिकअप चालकासह त्याच्या साथीदाराने कारमधून प्रवास करणा-या मायलेकींना अश्लिल शिवीगाळ केल्याची घटना घडली. वाहनास कट मारल्याच्या कारणातून हा वाद झाल्याचे बोलले जात असून याप्रकरणी मुंबईनाका पोलिस ठाण्यात गुन्हा दाखल करण्यात आला आहे. पीडित महिला व तिची मुलगी शुक्रवारी (दि.२३) दुपारच्या सुमारास मायको सर्कल कडून चांडक सर्कलच्या दिशेने आपल्या कारमधून प्रवास करीत असतांना ही घटना घडली. चांडक सर्कल नजीकच्या निलेश सुपर मार्केट समोर पाठीमागून आलेल्या मालवाहू पिकअप एमएच १५ जीएफ ७८५२ वरील चालकाने कारमधून प्रवास करणा-या मायलेकींची कार अडवित अश्लिल शिवीगाळ केली. यावेळी संतप्त चालकाने आपल्या साथीदाराशी संपर्क साधत बोलावून घेतले असता त्यानेही मायलेकींना जीवे मारण्याची धमकी देत अश्लिल शिवीगाळ केल्याचे तक्रारीत म्हटले आहे. अधिक तपास उपनिरीक्षक शेळके करीत आहेत.
