नाशिक (इंडिया दर्पण वृत्तसेवा) – लग्नाचे आमिष दाखवून तरूणीवर वारंवार बलात्कार केल्याप्रकरणी पोलिसांनी एकास अटक केली आहे. मनोज यशवंत जगताप (२७ रा. सावतानगर,सिडको) असे अटक केलेल्या संशयिताचे नाव आहे. लग्नास नकार देत अश्लिल फोटो सोशल मीडियावर व्हायरल केल्याने हा प्रकार पोलिसात पोहचला आहे. याप्रकरणी मुंबईनाका पोलिस ठाण्यात बलात्कार व आयटीअ‍ॅक्टसह विविध कलमान्वये गुन्हा दाखल करण्यात आला आहे.
भारतनगर भागात राहणा-या पीडितेने याप्रकरणी तक्रार दाखल केली आहे. संशयित व पीडिता यांच्यात प्रेमसंबध होते. गेल्या वर्षी ६ सप्टेंबर रोजी संशयिताने शिवाजी वाडी ते इंदिरानगर बोगदा दरम्यानच्या प्रवासात पीडितेस गुंगीची गोळी सेवन करण्यास भाग पाडून तिच्यावर बळजबरीने अत्याचार केला. यानंतरही लग्नाचे आमिष दाखवून त्याने वेळोवेळी बलात्कार केला.
पीडितेने संशयिताकडे लग्नासाठी तगादा लावला असता त्याने शिवीगाळ व धमकी देत लग्नास नकार दिला. एवढ्यावरच न थांबता त्याने अश्लिल फोटो सोशल मिडीयावर व्हायरल केल्याने पीडितेने पोलिसात धाव घेतली असून अधिक तपास चंद्रकांत आहिरे करीत आहेत.
