दिंडोरीरोडवर भरदिवसा झालेल्या घरफोडीत चोरट्यांनी दीड लाखाचा ऐवज केला लंपास
नाशिक (इंडिया दर्पण वृत्तसेवा) – भरदिवसा झालेल्या घरफोडीत चोरट्यांनी सुमारे दीड लाखाचा ऐवज लंपास केला. दिंडोरीरोडवरील वाढणे कॉलनीत घडलेल्या या घटनेत चोरटयांनी सोन्याचांदीचे दागिने चोरुन नेले. याप्रकरणी म्हसरूळ पोलिस ठाण्यात घरफोडीचा गुन्हा दाखल करण्यात आला आहे. वैशाली यशवंत भोये (३२ रा.पांडूरंग अपा.वाढणे कॉलनी,म्हसरूळ) यांनी याप्रकरणी तक्रार दाखल केली आहे.
भोये कुटुंबिय सोमवारी (दि.१३) नेहमीप्रमाणे कामानिमित्त घराबाहेर पडले असता ही घटना घडली. अज्ञात चोरट्यांनी भरदिवसा त्यांच्या बंद फ्लॅटचे कुलूप तोडून बेडरूममधील कपाटात ठेवलेले १ लाख ४२ हजार ५०० रूपये किमतीचा ऐवज चोरून नेला. त्यात सोनसाखळी,सोन्याचे वेढणे,वेढे,अंगठ्या व टॉप्सचा समावेश आहे. ही घटना रात्री साडे आठ वाजेच्या सुमारास कुटूंबिय घरी परतल्यानंतर उघडकीस आली. अधिक तपास उपनिरीक्षक माळी करीत आहेत.
धुडघूस घालीत घरावर दगडफेक, पार्क केलेल्या दुचाकीचे मोठे नुकसान
नाशिक (इंडिया दर्पण वृत्तसेवा) – शस्त्रधारी त्रिकुटाने धुडघूस घालीत एका घरावर दगडफेक करून पार्क केलेल्या दुचाकीचेही मोठे नुकसान केल्याची घटना गोरेवाडीतील शास्त्रीनगर भागात घडली. परिसरातील दहशत कायम राहवी या उद्देशाने सराईतांनी हातात धारदार कोयते व तलवारी घेवून हे कृत्य केल्याचा आरोप स्थानिकांनी केला असून याप्रकरणी नाशिकरोड पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार छकुल्या वाघमारे (रा.गायकवाड मळा, ना.रोड) व त्याचे दोन अनोळखी साथीदार अशी संशयितांची नावे आहेत. याप्रकरणी संदिप शंकर काकजीज (४५ रा.जयमाता किराणा समोर,शास्त्रीनगर,गोरेवाडी) यांनी याप्रकरणी तक्रार दाखल केली आहे. संशयित त्रिकुटाने रविवारी (दि.१२) रात्रीच्या सुमारास शास्त्रीनगर भागात हातात धारदार कोयते व तलावर घेवून धुडघूस घातला. परिसरात आपली दहशत कायम राहवी यासाठी या टोळक्याने परिसरातील नागरीकांना शिवीगाळ व दमदाटी केली.
यावेळी संतप्त टोळक्याने काकजीज यांच्या घरावर दगडफेक करून खिडक्यांच्या काचा फोडल्या. तसेच संजय साबळे यांची दारासमोर पार्क केलेल्या एमएच १५ बीसी ०५९४ या दुचाकीची तोडफोड करून मोठे नुकसान केले. सदर टोळक्याची या भागात मोठी दहशत असून अधिक तपास हवालदार शेख करीत आहेत.
