गावठी कट्टा घेवून फिरणा-या पोलिसांनी केले गजाआड
नाशिक (इंडिया दर्पण वृत्तसेवा) – शहर गुन्हे शाखेच्या मध्यवर्ती शाखेच्या पथकाने गावठी कट्टा घेवून फिरणा-या एकास गजाआड केले आहे. नांदूरनाका भागात संशयिताच्या ताब्यातून पिस्तूलसह जिवंत काडतुसे हस्तगत करण्यात आले आहे. समिर सुरेश पानसरे (२० रा.राहूरी – भगूर हल्ली माळीवाडा,देवळाली गाव) असे संशयिताचे नाव आहे. याप्रकरणी आडगाव पोलिस ठाण्यात गुन्हा दाखल करण्यात आला आहे. ही कारवाई केली.
नांदूरनाका भागातील एखंडे नाला भागात एकाकडे पिस्तूल असल्याची माहिती पोलिसांना मिळाली होती. त्यानुसार पोलिसांनी धाव घेत एखंडे नाल्याच्या पुलावर संशयिताच्या मुसक्या आवळल्या असता त्याच्या ताब्यात गावठी बनावटीचा कट्टा व एक जीवंत काडतुस मिळून आले. संशयिताने ते कोठून व कशासाठी आणले याबाबत तपास सुरू असून याबाबत अंमलदार प्रजित ठाकूर यांनी दिलेल्या फिर्यादीवरून पोलिस दप्तरी गुन्हा दाखल करण्यात आला आहे. अधिक तपास सहाय्यक निरीक्षक शिंदे करीत आहेत.
वेल्डींग काम करीत असतांना शिडीवरून पडल्याने एकाचा मृत्यू
नाशिक (इंडिया दर्पण वृत्तसेवा) – सिडकोतील दत्तचौक भागात वेल्डींग काम करीत असतांना शिडीवरून पडल्याने एकाचा मृत्यू झाला. सुनिल विक्रम वाघ (रा.दत्तचौक) असे मृत व्यक्तीचे नाव आहे. याप्रकरणी अंबड पोलिस ठाण्यात मृत्यूची नोंद करण्यात आली आहे.
वाघ सोमवारी (दि.१३) आपल्या राहत्या ठिकाणी वेल्डींग काम करीत असतांना ही घटना घडली. शिडीवर उभे राहून ते काम करीत असतांना अचानक तोल गेल्याने ते जमिनीवर कोसळले होते. या घटनेत त्यांच्या डोक्यास व पाठीस गंभीर दुखापत झाल्याने त्यांना तात्काळ आडगाव येथील मेडिकल कॉलेज येथे दाखल करण्यात आले होते. उपचार सुरू असतांना डॉ. अथर्व चौखंडे यांनी त्यांना मृत घोषीत केले. अधिक तपास पोलिस नाईक आवारे करीत आहेत.
