वडिलांबरोबर बँकेत गेलेल्या मुलीच्या
बॅगेतील ३२ हजार चोरट्यांनी केले लंपास
नाशिक (इंडिया दर्पण वृत्तसेवा) – स्टेट बँक ऑफ इंडियाच्या लेखानगर शाखेत वडिलांबरोबर बँकेत गेलेल्या मुलीच्या बॅगेतील ३२ हजार चोरट्यांनी लंपास केले. याप्रकरणी प्रविण दत्तात्रेय शिरोडे (५१ रा.दामोदरनगर,चेतनानगर) यांनी तक्रार दाखल केली असून अंबड पोलिस ठाण्यात चोरीचा गुन्हा दाखल करण्यात आला आहे.
शिरोडे गुरूवारी (दि.९) दुपारच्या सुमारास आपल्या मुलीस सोबत घेवून स्टेट बँकेच्या लेखानगर शाखेत पैसे भरण्यासाठी गेले होते. शिरोडे कॅशिअर समोरील रांगेत पैसे भरण्यासाठी उभे असतांना मुलगी बँकेतील दोन महिला बसलेल्या बाकड्यावर जावून बसली होती. यावेळी भामट्या महिलांनी मुलीने बाकड्यावर ठेवलेल्या सॅग बॅगेची चैन उघडून ३२ हजाराची रोकड हातोहात लांबविली. ही घटना बँकेतील सीसीटिव्ही यंत्रणेत कैद झाली असून पोलिस भामट्या महिलांचा शोध घेत आहेत. अधिक तपास हवालदार शेख करीत आहेत.
३२ वर्षीय तरुणाची आत्महत्या
नाशिक (इंडिया दर्पण वृत्तसेवा) – ३२ वर्षीय तरूणाने गळफास लावून आत्महत्या केल्याची घटना धात्रकफाटा परिसरात घडली आहे. अनिल एकनाथ उफाडे (रा.कल्पतरू बंगला,महालक्ष्मीनगर कुबोटा शोरूममागे) असे मृत युवकाचे नाव आहे. उफाडे यांच्या आत्महत्येचे कारण समजू शकले नाही. याप्रकरणी आडगाव पोलिस ठाण्यात मृत्यूची नोंद करण्यात आली आहे.
उफाडे याने गुरूवारी (दि.९) अज्ञात कारणातून आपल्या राहत्या घरात छताच्या लोखंडी हुकाला इलेक्ट्रीक वायर बांधून गळफास लावून घेतला होता. त्यात त्याचा मृत्यू झाला. ही बाब सायंकाळच्या सुमारास उघडकीस आली. भाऊ सुनिल उफाडे यांनी दिलेल्या खबरीवरून आडगाव पोलिस ठाण्यात मृत्यूची नोंद करण्यात आली असून अधिक तपास हवालदार बस्ते करीत आहेत.
