नाशिक (इंडिया दर्पण वृत्तसेवा) – गळय़ातील सोनसाखळी ओरबाडण्याचा प्रयत्न करणारा अहमदनगर येथील चोरटयाला पोलिसांनी गजाआड केले आहे. बसमध्ये चढतांना गर्दीची संधी साधत प्रवाश्याच्या प्रसंगावधानतेमुळे तो हाती लागला आहे. नागरीकांनी चोप देत त्यास पोलिसांच्या स्वाधिन केले आहे. संशयिताच्या अटकेने बसस्थानक आवारातील जबरीचोरीचे गुन्हे उघडकीस येण्याची शक्यता वर्तविण्यात येत आहे. याप्रकरणी मुंबईनाका पोलिस ठाण्यात जबरीचोरीचा गुन्हा दाखल करण्यात आला आहे.
संजय उर्फ सौरभ राजू माने (३७ रा.लाडजळगाव सध्या पाथर्डी जि.अहमदनगर) असे अटक करण्यात आलेल्या संशयित चोरट्याचे नाव आहे. याप्रकरणी अर्जुन नारायण बडगुजर (६३ रा.पांडवनगरी,इंदिरानगर हल्ली जयश्री कॉलनी,गुलमोहररोड अहमदनगर) यांनी तक्रार दाखल केली आहे. बडगुजर हे शुक्रवारी (दि.२४) सायंकाळी नगर येथे जाण्यासाठी महामार्ग बसस्थानकात गेले होते. नाशिक श्रीगोंदा बसमध्ये चढत असतांना ही घटना घडली. बसमध्ये चढत असतांना गर्दीची संधी साधत बडगुजर यांच्या गळयातील सोनसाखळी संशयिताने ओरबाडण्याचा प्रयत्न केला. या घटनेची चाहूल लागताच बडगुजर यांनी प्रसंगावधान राखत संशयिताचा हात पकडून आरडाओरड केल्याने तो हाती लागला. नागरीकांनी चोप देत त्यास पोलिसांच्या स्वाधिन केले असून त्याच्या अटकेने अनेक गुन्हे उघडकीस येण्याची शक्यता सुत्रांनी वर्तविली आहे. अधिक तपास उपनिरीक्षक श्रीवंत करीत आहेत.
