नाशिक (इंडिया दर्पण वृत्तसेवा) – नाशिक महापालिकेच्यावतीने चालविल्या जाणाऱ्या सिटिलंक ही शहर बससेवा पुन्हा एकदा ठप्प झाली आहे. वेतन मिळत नसल्याने कंत्राटी कर्मचाऱ्यांनी काम बंद सुरू केले आहे. त्यामुळे पहाटेपासून सर्व बसेस बंद आहेत. परिणामी, सकाळच्या सुमारास विद्यार्थ्यांसह नाशिककरांचे प्रचंड हाल झाले.
वेतन मिळत नसल्याने कंत्राटी कर्मचाऱ्यांनी पुन्हा एकदा आंदोलनाचे शस्त्र हाती घेतले आहे. गेल्या महिन्यातही या कर्मचाऱ्यांनी आंदोलन केले होते. त्यामुळे सलग २ दिवस बससेवा ठप्प होती. आता पुन्हा काम बंद आंदोलन कर्मचाऱ्यांनी घेतले आहे. कंत्राटदाराकजून वेतन मिळत नसल्याने कर्मचारी आक्रमक झाले आहेत. गेल्या आंदोलनावेळी झालेल्या बैठकीत कंत्राटदाराने सांगितले होते की, थकीत वेतन तातडीने अदा केले जाईल. मात्र, अद्यापही कर्मचाऱ्यांना वेतन मिळालेले नाही. त्यामुळे त्यांचा संयम संपला आहे.
दररोज लाखो प्रवासी शहर बससेवेचा लाभ घेतात. खासकरुन सकाळच्या सुमारास शहराच्या विविध भागातून शाळेत जाणारे विद्यार्थी, महाविद्यालयात जाणारे विद्यार्थी, सरकारी वा खासगी कार्यालयात जाणारे कर्मचारी, अंबड आणि सातपूर या औद्योगिक वसाहतीत जाणारे कामगार, नाशिकरोड रेल्वे स्टेशन येथे जाणारे प्रवासी आदी त्याचा लाभ घेतात. या सर्वांचेच खुप हाल होत आहेत. महापालिका आयुक्तांनी पुढाकार घेऊन तातडीने हा संप मिटवावा आणि शहर बससेवा सुरू करावी, अशी मागणी प्रवाशांकडून होत आहे.
nashik city bus citilinc service stop employee strike
municipal corporation payment salary
