मुंबई (इंडिया दर्पण वृत्तसेवा) – अधिक व्याज देण्याचे आमिष दाखवून गुंतवणुकदारांना गंडा घालणाऱ्या पंकज नंदलाल मेहाडिया आणि त्याच्याशी संबंधित सुमारे सतरा ठिकाणांवर सक्तवसुली संचालनालयाच्या (ईडी) नागपूर आणि मुंबई शाखेने गुरुवारी छापे टाकलेत. प्राप्त माहितीनुसार, यामध्ये आर संदेश ग्रुपचे रामदेव उर्फ रामू अग्रवाल, संजय अग्रवाल, अनिल पारख, लोकेश जैन, शैलेंद्र अग्रवाल, सनविजयचे संचालक संजय अग्रवाल, सुरेश बाजोरिया आणि मुंबई येथील विनोद गर्ग यांचे निवासस्थान आणि कार्यालयाचा समावेश आहे.
पंकज मेहाडिया याच्याविरुद्ध यापूर्वी नोव्हेंबर २०२१ मध्ये आर्थिक गुन्हे शाखेने फसवणुकीचा गुन्हा दाखल केला आहे. त्यानुसार मेहाडिया याला अटक करण्यात आली होती. मागील सहा महिन्यांपासून ईडी या प्रकरणाचा तपास करीत आहे. दरम्यान, हा घोटाळा पाचशे कोटींहून अधिकचा असल्याची माहिती पुढे आली आहे. यामध्ये काही व्यापाऱ्यांनी त्यांच्याकडील काळा पैसा (गैरमार्गाने कमविलेली संपत्ती) गुंतवल्याची शक्यता वर्तविण्यात येत आहे.
जवळपास पन्नासहून अधिक जणांच्या चमूने गुरुवारी सकाळी ८ वाजतापासून सुरू केलेली कारवाई सायंकाळी उशिरापर्यंत सुरू होती. रामू अग्रवाल यांचे रामदासपेठेतील गौरी हाइट्स हे निवासस्थान, संदेश इन्फ्रास्ट्रक्चर प्रायव्हेट लिमिटेडचे कार्यालय, संजय अग्रवाल यांच्या सनविजय कंपनीचे ग्रेट नाग रोडवरील कार्यालय तसेच सदर आणि रामदासपेठेतील संलग्नित प्रतिष्ठानांवर छापेमारी करण्यात आली. कारवाईदरम्यान प्रकरणाशी संबंधित महत्त्वाचे दस्तऐवज जप्त करण्यात आले. यामध्ये काही चार्टर्ड अकाउंटंट्सचाही समावेश असून त्यांच्याही कार्यालयावर छापे टाकण्यात आल्याचे बोलले जात आहे.
स्टील, लोह उद्योगातील भागीदारही रडारवर
पंकज मेहाडियाशी संबंधित स्टील, लोह, कोळसा, बांधकाम, हवाला उद्योगातील त्याचे सहकारी आणि भागीदार ईडीच्या रडारवर आहेत. त्यांच्यावरसुद्धा कारवाई झाल्याची माहिती पुढे येत आहे. मात्र, या संदर्भात ईडीकडून अधिकृत दुजोरा मिळू शकला नाही.
Nagpur ED 17 Places Raid Real Estate Traders
