मुंबई – भारताचे राष्ट्रपती रामनाथ कोविंद यांचे चार दिवसांच्या महाराष्ट्र भेटीसाठी आज येथील छत्रपती शिवाजी महाराज आंतरराष्ट्रीय विमानतळावर भारतीय वायुसेनेच्या विशेष विमानाने सपत्नीक आगमन झाले.
यावेळी राज्यपाल भगतसिंह कोश्यारी, राजशिष्टाचार मंत्री आदित्य ठाकरे, राज्यमंत्री अदिती तटकरे, मुंबईच्या महापौर किशोरी पेडणेकर यांच्यासह मुख्य सचिव देबाशिष चक्रवर्ती, सेनादलाचे वरिष्ठ अधिकारी, वरिष्ठ पोलीस अधिकारी, प्रधान सचिव तथा मुख्य राजशिष्टाचार अधिकारी मनीषा म्हैसकर, मुंबई उपनगरच्या जिल्हाधिकारी निधी चौधरी आदींनी त्यांचे स्वागत केले. यानंतर राष्ट्रपती रामनाथ कोविंद यांचे हेलिकॉप्टरने रायगडकडे प्रयाण झाले.
राष्ट्रपती कोविंद हे ७ डिसेंबरला भारतीय हवाई दलाचा तळ असलेल्या लोहगाव (पुणे) येथे भेट देतील. तिथे ते हवाई कसरतींची (फ्लाईंग डिस्प्ले ) पाहणी करतील. तसेच हवाई दलातील योद्ध्यांशी संवाद साधतील. तर, ८ डिसेंबर रोजी राष्ट्रपती हे मुंबईत क्षेपणास्त्रवाहू युद्धनौकेवरील २२ व्या तुकडीला राष्ट्रपती प्रेसिडेंट’स स्टॅंडर्ड हा विशेष सन्मान प्रदान करतील.